Langabetuentzat baratze profesionalak prestatuko dituzte Auditz Akularren
Altzako Auditz Akularren langabetuentzat baratze profesionalak ahalbidetzeko proiektua martxan jarri du Donostiako Udalak. 2017ko apirilean eman zuten proiektuaren berri, eta Altzako Auditz Akularren kokatutako partzelak egokitzeko lanak gaur, asteartean, hasiko dira; bideak eta sarbideak egokituko dituzte, urak kanalizatu eta denek erabiltzeko espazio bat eraikiko dute, tresnak eta nekazaritzako makineria gordetzeko.
Gaur goizean aurkeztu dute Alkateordetzak, Donostiako Sustapenaren bitartez, abian jarri duen Donostia Urban Lur proiektua. Nekazaritzako produktuen ekoizpenean oinarritutako enpresa proiektu bat martxan jarri nahi duten herritarren eskura ondorengoak jarriko ditu: laborantzarako lur saila eta azpiegitura egokiak, lana egiteko tresnak, nekazaritza eta negozio arloko prestakuntza teknikoa eta produktuak merkaturatzeko laguntza eta aholkularitza.
Donostia Urban Lur proiektuak sei pertsonari 2,74 hektareako espazioa eskainiko diela jakinarazi dute, 4.000 eta 6.000 metro karratu arteko sei partzelatan zatituta. Horiek guztiek ur-hornidura, 380 metroko berotegi-tunela eta ibilgailu mekanikoentzako sarbidea izango dituzte. Halaber, Fraisoro eskola profesionalak nekazaritzako prestakuntza teknikoaren ibilbidea eskainiko die erabiltzaileei; baita ekintzailetza proiektua gauzatzeko enpresa prestakuntza eta produktuak merkaturatzeko aholkularitza eta laguntza ere bai.
- Aurkeztutako proiektuaren diseinua eta kalitatea.
- Proiektuaren bideragarritasuna.
- Proiektuaren garapen iraunkorra: ekoizpen ekologikoko ustiapenak.
- Prestakuntza. Prestakuntza espezifikoa beharrezkoa ez den arren, nekazaritzarekinlotutako ikasketak kontuan hartuko dira.
Interesatuek eskaera egin ahal izango dute Donostiako Sustapenaren web orrialdean, deialdia Gipuzkoako Aldizkari Ofizialean argitaratu ondoren.
Aurkezpenean, honakoa adierazi du Ernesto Gasco alkateordeak: “Ekimenaren bitartez, Donostiak hiriko nekazaritza-sektorea aintzatesteko bidea egiten jarraitzen du. Guztiona Klusterrarekin gure inguruneko ekoizleak bildu genituen, eta jarduera honekin, tokiko ekoizpenaren ahalmena areagotu nahi dugu, barne-kontsumoa hornitzearren. Gainera, dagoeneko harremanetan jarri gara supermerkatuen kate batzuekin, produktuen banaketa bermatze aldera”.
