Karamo Jawara fitxatu du Gipuzkoa Basketek datorren denboraldirako
Karamo Jawara (Norvegia, 1991) fitxatu du Gipuzkoa Basketek datorren denboraldirako. Marcelo Nicola entrenatzaile berriaren agindupean arituko da 2,03 metroko pibota. Entrenatzaile berriaren proiektuan beste hainbat fitxaketa iragarri ditu klubak orain arte, besteak beste, Mikel Motos, Mikel Uriz, Xabi Oroz, John Dee eta Davis Rozitis.
Bere ibilbidearen hasieran AEBetako NCAA ligaren lehen mailan jokatu zuen, North Carolina Central Eagles taldean. Ondoren, Greziako A-2 ligan jokatu zuen; baita Errumanian eta Txipren ere. 2013an Norvegia ordezkatu zuen Kazanen (Errusia) egindako Munduko Unibertsitate-jokoetan.
Jawarak Club Xuventude Baloncesto Pontevedrako klubean hasi zuen 2017-2018ko denboraldia, Zilarrezko LEB ligan. Egindako ibilbide onaren ondorioz, Urrezko LEB ligako Palma Air Europa taldeak (txapelketan bigarren balorazio hoberena jaso zuen) bere klausula ordaindu zuen. Urrezko LEB ligaren denboraldi horren bigarren zatian honako batezbestekoa egin zuen: 7,3 puntu, 4,8 errebote, 1,1 asistentzia, eta %50a hirukoetan.
