Zaldibarko zabortegian gertatutakoa argitzeko eta hondakinen kudeaketa osasuntsu baten aldeko kontzentrazioak egingo dituzte
Erraustegiaren Aurkako Mugimenduak deituta, hainbat mobilizazio egingo dituzte asteazkenean, hilaren 12an, 19:00etan. Zaldibar argitu, erraustegia gelditu! lelopean, elkarretaratzeak egingo dituzte Hernanin, Usurbilen, Andoainen, Oiartzunen, Urnietan, Iruran eta Lasarte-Orian. Donostian udaletxearen aurrean egingo dute protesta, eta Zubietan Alamandegin. “Zaldibarko eskandalua modu lotsagarrian kudeatzen ari direnek erraustegia inposatu nahi digute”, salatu du mugimenduak. Hondakin kudeaketa osasuntsu baten alde kalera ateratzeko deitu dituzte herritarrak.
