Realak aurkari gogor batekin egin du topo
(Argazkia: Reala) Anoetara iritsi aurretik, Mirandesek Celta, Sevilla eta Villarreal kanporatu ditu. Seinaleak hor zeuden, alegia. Baina, atzo, batek edo bestek sorpresa handia hartu zuen Realaren aurka jokatzen ari zen taldearen grina ikusterakoan.
Realak irabazi egin zuen, bai, baina Miranda Ebrokoak bizirik atera ziren Anoetatik, 2-1eko emaitzarekin. Kanporaketa, hortaz, Anduva zelaian erabakiko da, akatsetarako tarterik gabe. Donostiarrei harri-koskor bat gurutzatu zaie Sevillarako bidean, eta helmugara iristeko, pauso bakoitza ongi neurtu beharko dute hemendik aurrera.
Imanol Alguacilen taldea urduri egon zen partida osoan zehar, eta aurkariek, berriz, oso argi zuten haien helburua. Gauzak horrela, donostiarrak ezin izan ziren zelaian gailendu, hobeak izan arren. Mikel Oyarzabalek lehenengo zatian ireki zuen markagailua, penaltiz, baina Mirandesek Matheusen golarekin erantzun zuen. Atsedenaldira iritsi aurretik, ordea, Odegaardek baloia sarera bidali zuen zartako batekin, Limones atezainak bi geldiketa bikain egin ostean.
Bigarren zatia, aldiz, golik gabe igaro zen, baina tentsiorik ez zen falta izan, denek ongi baitzekiten finalerdi batean hanka-sartze batek behin betiko kondenatu zaitzakeela. Azkenean, garaipena Realarentzat izan zen, baina inor ez dadila engainatu. Finalera iristeko, atzo hasitakoa Anduvan amaitu beharko da.
