Aurten ez da Aste Nagusirik izango
Donostiako Udalak jakinarazi berri du aurten ez dela Aste Nagusirik izango. Eneko Goia Donostiako alkateak, Juan Mari Aburto Bilboko alkateak eta Gorka Urtaran Gasteizko alkateak gaur goizean erabaki dute hiriburuetako jaiak ezin izango direla uda honetarako aurreikusita zeuden egunetan ospatu.
[Artxiboko argazkia] Aste Nagusiko 55. Su Artifizialen lehiaketa. Irutxuloko Hitza 
Erabaki hori, jende asko biltzen dituen ekitaldirik ez egiteko aginduari jarraituta, eta Osasun Publikoaren Sailak, Eusko Jaurlaritzak eta Eudeleko Batzorde Betearazleak emandako aholkuak “aintzat hartuz” erabaki dutela adierazi dute.
Lehendakariarekin, Eusko Jaurlaritzako sailburuekin eta hiru lurralde historikoetako diputatu nagusiekin egindako azken bileren ondoren, hiru alkateek batera aztertu dute COVID-19ak Euskal Autonomia Erkidegoan eragindako egoera. Honela azaldu du Donostiako Udalak ohar batean: “Hainbat agertoki aztertu ondoren, hiru euskal hiriburuetako alkateek erabaki dute beren Aste Nagusia aurten ez ospatzea, eta euren udal taldeekin eta hiri bakoitzeko gizarte- eta kultura-eragileekin lan egitea, 2020ko udan kultura-, arte- eta aisia-jardueren egutegia egin ahal izateko”.
Goiak honakoa adierazi du: “Ez da inork nahi duen egoera, baina osasunari eman diogu lehentasuna beste edozein kontsiderazioaren gainean”. Alkateak gaineratu du udalak “beste era batera” antolatuko duela Donostiako uda, eta baieztatu du “oporrak beharrezko segurtasun bermeekin bateragarri egiteko formulak eta ekitaldiak bilatuko direla”. “Hau urte desberdin bat da, eta, beraz, uda eta jaietako tradizioak berrasmatu egin beharko ditugu modu desberdinean bizi ahal izateko”, ondorioztatu du EAJkoak.
