Igeldoko jaiak bertan behera utzi dituzte
Igeldoko jaietako Umore Horiyaren proba bat. (Argazkia: Ttonttorro jai batzordea) 
Donostiako Aste Nagusia bertan behera utzi du udalak goizean, baina ez da ospatuko ez den jai bakarra. Izan ere, koronabirusaren krisia dela eta, aurtengo Igeldoko San Pedro jaiak ez ospatzeko erabakia hartu dute Ttonttorro jai batzordeak eta Igeldoko Herri Kontseiluak. Sare sozialetan zabaldutako ohar batean azaldu dutenez, ez dituzte baliabide nahikoak jaiak antolatu eta herritar guztien segurtasuna bermatzeko. “Instituzioetatik jarri diren baldintzak bete behar izateak ekintza batzuk bertan behera uztea eta jaien izaera parte hartzailea kolokan jartzea lekarke”, gaineratu dute. Jaiak ekainaren 21etik uztailaren 2ra ziren egitekoak.
Era berean, euren ustez, “ez da jaiak antolatzen aritzeko unea”, izan ere, gizarteak beste kezka garrantzitsuago batzuk dituela: “Herri ikuspegi batetik, elkar zaintza eta osasuna lehen lerroan jartzeko unea da. Txarrenari onena ateratzekoa”.
Jaietan herritarren harremanak sakontzen dituztela azpimarratu dute, baita hainbat balore –euskara, parekidetasuna, parte hartzea, eta abar– lantzen dituztela ere. Horregatik, erabakia “zaila” izan dela esan dute, eta “herri gisa indartuta” aterako direla nabarmendu dute. Horretaz gain, etorkizunean jardueraren bat antolatzeko aukera aztertuko dutela adierazi dute, baina horrek ez dituela jaiak ordezkatuko.
