Informazioa eta entretenimendua lortzeko ‘oasiak’

Konfinamendua ezarri zenean, prentsa saltzen zuten liburu denda eta kioskoek irekita jarraitzeko aukera izan zuten, eta herritar askorentzat, etxean denbora pasatzeko materiala erosteko gertuko aukera bakarra izan dira.

Maite Reizabal

2020/05/15

Alerta egoeran, egunkari eta aldizkarien salmenta igo egin da oro har. Asko izan dira auzoetako liburu denda txikietara jo dutenak. Ane Intxausti Aieteko Ane liburu dendako jabeak adierazi duenez, bere dendan “egunkarien zein aldizkarien salmenta %15 hazi da gutxi gora behera konfinamendu garaian”. Antiguako Garazi liburu dendako jabeak, Adrian Caminok, berriz, egunkarien salmenta igoera ez du horrenbeste nabaritu. “Guk aldizkarien kontsumoa apur bat hazi dela antzeman dugu».

Caminok esan duenez, martxoaren 14a izan zen lanpetuen ibili ziren eguna, alegia, konfinamendua ezarriko zutela jakin zuten eguna. Geroztik, salmentak baretuz joan dira, batik bat kalera irteteko aukera dagoenetik. Intxaustik ere nabarmendu du alerta egoeraren lehen egunetik gaur arte alde handia izan dela, gehienbat egunkariei dagokienez: “Aste Santurarte bizpahiru egunkari erosten zituzten zenbaitek, baina salmenta baretu egin zen ondoren”.

Egunkariak baino gehiago, aldizkariak agortu dituzte bezeroek. “Bidaiei buruzko aldizkariak baita ere, harritzekoa bada ere”, kontatu du Caminok. “Batik bat, txutxu-mutxu eta denbora-pasa aldizkariak bukatu direla esango nuke”, azpimarratu du Intxaustik. Eta, batez ere, asteburuetan.

Ane Intxausti Ane liburu dendako sarreran. (Argazkia: Maite Reizabal)

Liburu dendak izateaz gain, paper dendak ere badira Ane eta Garazi. “Eskulanak egiteko materiala eta denbora pasatzeko jolasak (puzzleak, mahai-jokoak, eta abar) normalean baino gehiago saldu ditugu”, dio Caminok. Eta Intxausti ere bat dator.

Etorkizun hurbila: salmenten jaitsiera

Salmentak baretu egin dira irteteko aukera dagoenetik. “Eta uste dut oraindik gehiago jaitsiko direla”, esan du Intxaustik. Gainera, bi liburu dendek, eskolako materiala saltzen dute, eta udan egin ohi dute eskaera, baina datorren urtean zer gertatuko den airean dago. “Irailetik aurrera izango den egoerak eskolako materiala saltzeko eta erosteko moduan eragin dezake. Esaterako, koaderno bat eramatea irakasgai bakoitzerako edo,ordenagailutik arituz gero, koaderno bakarra irakasgai guztietarako”. Testuliburuekin berdina gerta daiteke. “Informazio gehiago izan arte ez gara hasiko antolatzen. Badakigu irtenbide berriak eskaintzeko adi egon behar dugula”.

Hasieran bi saltokiek ordutegia murriztu bazuten ere, Aieteko liburu denda ohiko ordutegira itzuli da, eta gauza bera egingo du Antiguakoak datorren astean. Bigarrenak, gainera, online denda ere martxan jarri du.