Maria Cristina hotelak COVID-19ak kutsatutako paziente arinak hartzeari utzi dio
Eneko Goia alkateak eta Itziar Perez Donostia Ospitaleko gerenteak Maria Cristina hotelean jarritako Osakidetzaren eta Eusko Jaurlaritzaren plakak kendu dituzte, hotela bere horretara itzuliko dela irudikatzeko. (Argazkia: Irati Salsamendi)
Agerraldia egin dute gaur goizean Eneko Goia alkateak, Itziar Perez Donostia Ospitaleko gerenteak, Antonio Arraiza Osakidetzako proiektu koordinatzaileak Maria Cristina hotelean. Hain zuzen, jakinarazi dute hemendik aurrera hotelak ez dituela hartuko koronabirusak kutsatutako gaixo gehiago, eta gaineratu dute atzo eman ziotela alta azken pazienteari.
Koronabirusaren inguruko azken asteetako datu “onen” ondorioz hartu dute erabakia, eta pazienteak hartzeko hotelaren lau solairu prestatu bazituzten ere, solairu bateko 28 gela besterik ez dituztela erabili azaldu dute. Berez etxean egon zitezkeen gaixoak hartuko ditu bost izarreko hotelak, senideak kutsatzeko arriskua zutelako, edo etxean bakartuta egoteko behar ziren baldintzak ez zituztelako.
Martxoaren 28an jakinarazi zuten Donostiako Udalak Osakidetzari utziko ziola hotela, birusak kutsatutako paziente “arinak” hartzeko. Orotara, 58 gaixo igaro dira Maria Cristinatik azken sei asteetan, eta bakoitzak bi aste igaro ditu han, batez beste; gehienak Donostialdekoak izan direla azaldu dute. Era berean, hamahiru osasun-langile inguru aritu dira gaixoak zaintzen, eta gehienak OSI Donostialdekoak izan dira. Horiekin batera aritu dira ere Maria Cristinako hainbat langile: garbitzaileak, mantenukoak eta segurtasun arduradunak, besteak beste.
Hotela gaixoen beharrak asebetetzeko prestatu behar izan zuten apirila hasieran, eta apirilaren 7an hartu zuen lehenengoa. Arraizak gaur goizean adierazi duenaren arabera, esperientzia “berria eta pozgarria” izan da. Gaur utziko dute eraikina osasun-langileek, eta alkateak azaldu du lanari ekingo diotela hotela bere horretara itzultzeko; kudeaketa, beraz, Marriot katearen eskuetara itzuliko da, Donostiako Udalak, Osakidetzak eta kateak berak sinatutako akordioa amaitutzat ematearekin batera. Alkateak iragarri duenez, uztailaren 1erako aurreikusi dute Maria Cristinaren irekiera, beti ere bizi dugun egoerak eragindako “ziurgabetasuna” kontuan hartuta, eta datozen asteetako gertakarien arabera.
Alkateak agerraldian esan du berria “irribarre egiteko modukoa” dela, baina egoerak hobera doazen arren, ezin dela “guardia jaitsi” ohartarazi du. Era berean, eskerrak eman dizkie osasun-langileei eta Osakidetzari.
