Porrontxo jairik ez da izango, baina telebista saio berezi bat emango dute ostegunean
Iazko Porrontxo jaietako danborrada. (Argazkia: Iñaki Agirre) 
Egiako Porrontxo jaiak, gainontzeko jai herrikoien moduan, bertan behera gelditu dira, baina Egiakoek 2021eko Porrontxo jaietarako gutxiago gelditzen dela nabarmendu nahi dute, eta telebista saio berezi bat prestatu dute.
Hain justu, azken hamarkadotako “irudi onenak, barregarrienak eta hunkigarrienak” bildu dituzte, eta “telesail herrikoi” bat osatu dute, auzotarrak alaitzeko helburuarekin. Telesaila koadrilek jaiei hasiera eman behar zioten egunean eta orduan emango dute, hau da, ostegunean, hilaren 17an, 19:55ean. Hamaika Telebistan ikusi ahal izango da zuzenean, eta 20:30era arte iraungo du. LTD-ren eta Euskaltelen bitartez ikusi ahal izango da, baina baita Hamaika.eus eta Hamaika.naiz.eus webguneen bitartez eta Hamaika Telebistaren Facebook orrialdearen eta Youtubeko kanalaren bitartez ere.
