Lugañenea baserrian geratu nahi dute
Urumearen ezker ertzeko erriberan dago, Martutenen. XIX. mendekoa da eta 1973tik Donostia Arraun Lagunak klubaren egoitza da, eta eraisteko arriskuan dago.
Jose Ramon Gomez eta Itziar Eguren, Lugañenea baserriaren atarian. (Argazkia: Inaxio Esnaola) 
Ibaiaren ur goraldiei aurre egiteko proiektuak eraikina botatzea aurreikusten du uholde arriskuko eremuan dagoelako. Une honetan, Urumea zabaltzeko lanen bigarren fasea egiten ari dira, eta hori bukatzerakoan espero da Lugañenea eraistea. Ancora elkarteak baserria babesteko eskatu dio Donostiako Udalari, baina ez du erantzunik jaso.
Itziar Egurenekin eta Jose Ramon Gomezekin elkartu da IRUTXULOKO HITZA, Lugañenea baserrian. Arraun Lagunakeko presidentea eta presidente ohia dira, hurrenez hurren. Duela sei urte prentsaren bidez jakin zuten euren egoitza desagertzeko arriskuan dagoela. Udalarekin hainbatetan elkartu dira, eta klubaren Martuteneko instalazioak erakutsi nahi dizkiete. «Interesgarria litzateke udal ordezkariak hona etortzea. Baserriaren hormak, zutabeak eta habeak orijinalak dira, ez ditugu ukitu. Egoera onean daude eta duten balioa aitortzea eskatzen dugu», azpimarratu du Gomezek.
Milaka arraunlari donostiar pasa dira Lugañenetik, eta beste asko pasako direla uste du Egurenek: «Horrek balio sozial garrantzitsua ematen dio klubari. Aurten Donostian arraun fitxa gehien egin dituen kluba gara, eta datorren urteari begira gehiago izango direla aurreikusten dugu». Iritzi berekoa da Gomez: «Gure kirol bizitza da Lugañenea, eta hiriari zein arraunari egin diogun ekarpena agerikoa da».
Ostiraleko astekarian erreportajea osorik irakurri ahal izango da.
