Nemerekin joango da 'Gallego'-a
'Gallego'-aren jabea, Neme Fociños, oso ezaguna zen auzoan bere adeitasunagatik. (Argazkia: Mikel Elkoroberezibar Beloki) Amara Berriko nor ez da joan ‘Gallego’-arenera erlojua konpontzera, irrati bat erostera edo aparailu elektroniko bat konpontzera? Auzo guztiak ezagutzen du Bazar Carlos I, edo jendeak deitzen dion bezala: ‘Gallego’-a. Haren azken jabea, Neme Fociños, hil berria da, eta harekin batera joango ‘Gallego’-a auzotik, itxi egingo baitute.
Urte askotako ibilbidea du dendak, eta auzotarren behar askori erantzuten die: burgindegi funtzioa izateaz gain, elektronikarekin lotutako gailuak saltzen ditu, baita aparailu elektrikoak konpondu ere. Urriaren 16an desagertuko da ‘Gallego’-a auzotik, jabea zendu ostean.
Izan ere, Neme Fociños oso ezaguna zen auzoan, bere profesionaltasunagatik eta adeitasunagatik. Aurreko hilabetean hil zen, bihotzekoak jota, bezero batekin zegoela. Bere heriotzak auzoko bizilagunen harridura eta atsekabea eragin ditu, eta askotariko mezuek eta lore sortek apaindu dute, aste askotan, ‘Gallego’-aren kanpoaldea. Dendaren kanpoaldean ere omenaldia egin zioten auzotarrek Nemeri.
Bere alargunak auzotarrei jakinarazi die, mezu baten bidez, denda “behin betiko” itxi egingo dutela. Urriaren 9an, eta 13tik 16ra, bezeroentzat irekita egongo da denda, konpontzen utzitako objekturen bat jasotzeko. Urriaren 16an ‘Gallego’ denda itxi egingo dute “behin betiko”, eta Amara Berriren ikur bat desagertu egingo da.
