Blanquita Carraquelak 'Azalak' bigarren singlea plazaratu du
Asier Beramendi musikari donostiarraren proiektu berria da Blanquita Carraquela. 
Asier Beramendi musikari donostiarrak Eraul taldetik Blanquita Carraquela bakarkako proiektura bitarte egindako bidea erakusten du Azalak kantuak. Udan hasi zuen proiektuak ibilbidea, Bourgogne aurkezpen abestiarekin, eta harrera goxoa jaso du hedabide eta plataforma digitalen eskutik.
Taldearentzat ohikoa zen bezala gitarra eta ahots konposizioetan oinarritua egon arren, erritmo, soka eta sintetizadoreek kantua soinu-mapa berri batera daramate. Musikaria kantugilearen rolaz harago doa eta bere musikaren produktore bilakatzen da orain, bi eginkizunen arteko muga lausotuz. Txoko izkutu eta lagunartekoa da emaitza, hauskorra eta indartsua, dantzatzera bezain beste elkar besarkatzera gonbidatzen gaituena.
Iñigo Astiz poeta, itzultzaile eta kazetariak idatzi ditu Azalak kantuaren hitzak: beharrezko agur sentibera bat, etorkizunez beteriko zina eta zeharka esandako “barkatu” bat.
