Txomiñeneko eta Loiolako zeharbidearen inguruko hausnarketa plazaratu du Kalapiek
Txomiñeneko zeharbidea. (Argazkia: Kalapie) 
Kalapie Hiriko Txirrindularien Elkarteak Txomiñeneko eta Loiolako zeharbidearen inguruko hausnarketa egin dute, mugikortasunaren ikuspegitik. Txomiñenean, Loiolan eta Martutenen eraikitako bidegorri berriek “kalitate nahikoa” dutela adierazi dute, “txirrindularien segurtasuna bermatzeko”. Ordea, “ia beti bezala”, saihets zitezkeen akatsak dituztela azpimarratu dute.
“Proiektuaren definizioan eta exekuzioan txirrindulariek parte hartuko balute, eta hirigintza zein mugikortasun diseinua horretarako berariaz prestatutako gida tekniko eguneratuetan oinarrituko balute, horrelako akatsak saihestuko lirateke”, dio Kalapiek. Aipaturiko akatsak zerrendatu dituzte:
- Laurogeita hamar graduko bira egitera behartzen duen bidegorrirako konexio bira sarrera bat dago.
- Ez hasieran ez amaieran konexiorik ez duen bidegorri-zati bat –Felisa Martin Bravo kalearen eta Kristobaldegi bidearen artean, Goikoenea kaletik– eraikitzea. Zer helbururekin eraiki da bidegorri zati hori?
- Beste bidegorri batean diseinu hutsegite bat dela eta, aparkatutako autoek bizikleta bide baten erdia okupa dezakete.
- Bizikletentzako aparkalekuak etxebizitza eraikinetan. Auzo ekologikoa izaki, etxebizitza berrietan, eraikin bakoitzeko, zero kotan, bizikletentzako aparkaleku komunitario bat jartzea aurreikusi zen. Baina, obra egitean, garajeetan halakotzat jo ezin diren “bizikletentzako aparkalekuak” instalatu dituzte: horman sartutako kakoak besterik ez dira, ezertarako balio ez dutenak.
- Beste hutsune garrantzitsu bat Antzieta pasealekuan barrena doan bidegorriak auzorako bost sarreretan edo pasealekua inguratzen duten etxebizitzetako garajeetarako sarreretan duen desnibela da (txirrindularientzako errusiar mendi bat al da?). Bizikletek salto egiten dute eta gerrialdeak min hartzen du desnibelaren inpaktuarekin. Bide batez, esan beharra dago desnibel hori zuzendu egin dela autoentzat, ez txirrindularientzat, ordea. Ziur aski, bidegorria diseinatu duena ez da maiz bizikletan ibiltzen edo motordun ibilgailuei lehentasuna eman nahi izan die (ahalik eta gutxien molestatu), oinezko eta txirrindularien kaltetan.
- Gainera, Antzietako pasealekuan ez da zuhaitzik landatu.
- Azkenik, kezkatuta daude, euren ustez, auzoan semaforo gehiegi jarri direlako. Duela hilabete batzuk, ahal den neurrian, hiriko semaforo kopurua minimizatzeko beharra argitara eman zuten. Aldiz, auzo honetan, kaleen arteko bidegurutzeetan behar ez diren semaforo asko jarri dira. Auzoan, motordun ibilgailuek ez lukete 20-30 km/orduko abiadura gainditu beharko eta mugikortasun aktiboa lehenetsi beharko litzateke. Horregatik, ez zaie premiazkoa iruditzen hainbeste semaforo jartzea.
“Espero dugu akats horiek zuzendu ahal izatea eta Urumea ibaia Martutenetik pasatzean zabaltzeko proiektua egiten denean (une honetan 2. fasean dago), 27. Industrialdeko zubiaren mailan, kontuan hartzea zubi azpitik oinezkoentzako eta bizikletentzako bidea pasa behar dela, proiektuaren planoetan agertzen den bezala. Horrez gain, nabarmendu nahi dugu gaur egun ez dagoela bizikleta-bide segururik 27. Industrialdera iristeko, eta behar-beharrezkoa iruditzen zaigula”, gaineratu dute.
Une honetan, Loiolako zeharbidea egiten ari dira, kuarteletako biribilgunearen eta Loiolako Erriberako biribilgunearen artean. “Hainbat auzotar publikoki kexatu dira komunikabideetan zabaldu den bidegorriaren diseinuaz, eremu partekatuetan txirrindularien eta oinezkoen artean sor daitezkeen gatazkak azpimarratuta”, azaldu dute. “Gure iritziz, kuarteletako zubiaren pareko biribilgunearen ondoan dagoen gunean dago kontaktu handiena eta oinezkoak txirrindulariekin nahastu egiten dira ia. Uste dugu merezi duela ahalegin bat egitea istripuak eta oinezkoekin sor daitezkeen gatazkak saihesteko; hori izan da beti gure helburua”.
Azken hilabeteetako erabilera datuen arabera, zeharbidetik pasatzen den bizikleta bidean txirrindulari asko ibiliko dira, bide horrek hiria Urumearen arroko beste hirigune batzuekin lotuko baitu. “Beraz, nahitaezkoa da auzoekin eta 27. Industrialdearekin konexio eroso, azkar eta segurua ezartzea auto erabiltzaileak autoa uztera eta bizikleta erabiltzen hastera animatzeko”, nabarmendu dute.
Azkenik, gaineratu dute proiektuaren diseinua ez dela “ausarta eta handinahaia”; “motordun ibilgailuentzako erreiak lautik hirura murriztu dira”. Hasierako hainbat planotan, noranzko bakoitzeko errei bakarra uzteko aukera planteatu zen. Izan ere, orain, noranzko bakoitzeko errei bakarrarekin ibilgailuak ezin hobeki zirkulatzen ari dira. “Orduan, zergatik ez dugu bere horretan uzten? Garaiotan, ez da ulergarria bere horretan ez uztea eta hirigunea banatzeko joan den mendeko politikak aplikatzea, ez baita onuragarria herritarrek autoa erabiltzeari uztea nahi badugu”, adierazi dute.
