Donostiako Udalak 20.000 euroko diru-laguntza emango dio Zaporeak elkarteari
Moriako kanpamenduaren sutearen ondoren, Zaporeak elkarteak janari bilketa egin zuen Donostian. (Argazkia: Maite Reizabal) 
Donostiako Udaleko Lankidetza sailak 20.000 euroko diru-laguntza emango dio Zaporeak elkarteari, Chios (Grezia) uhartean garatzen ari den proiektuan laguntzeko. Duñike Agirrezabalaga Kooperazio zinegotziak Lesbosen dauden errefuxiatuen egoeraren larritasuna nabarmendu du: “Irailaren 9an suak errefuxiatuen gunea suntsitu zuenetik, egoerak ez du hobera egin. Sute hark agerian utzi zituen landa-eremuaren gainpopulazioa, asilo-sistemaren arazo handiak eta uhartean blokeatuta dauden eta soilik Greziako gobernuaren menpe dauden milaka pertsonen oinarrizko gabeziak”. Era berean, gaineratu du errefuxiatuen egoerak ez duela hobera egin kanpamendu berriarekin: “Moirako kokagune berrian, errefuxiatuek janari bakarra jasotzen dute egunero, eta, horretarako, ilara amaigabeak egin behar dituzte. Zaporeak-ek banaketa ofizialetik baztertutako pertsona ahulenei janaria emateko sistema bat sortu du”.
Udalak ‘Moirako sutea: Lesbosko larrialdia arintzen’ proiektura bideratuko du dirua. Proiektu horren helburuak honakoak dira: Lesbos uhartera elikagaiak bidaltzea, uhartean elikagai freskoak erostea, elikagaien biltegia kudeatzea eta sukaldaritzako txandetarako boluntarioak aukeratzea, janaria prestatu, erabili eta banatu ahal izateko. Zaporeak elkartea 2016tik dago Grezian, eta 700.000 janari anoa baino gehiago banatu ditu dagoeneko errefuxiatuen artean.
Hedabide honek Iñaki Agirre kazetariarekin hitz egin du berriki, izan ere, Agirre Lesbosen izan da ekainetik Zaporeak elkartearekin, eta laster itzuliko da hara.
