Radarraren zain jarraitzen dute Amara Berriko auzotarrek
Karlos I.aren hiribidea. 
Karlos I.aren hiribidean radarra jartzeko beste eskaera bat egin du Amara Berri Auzo Elkarteak. Hamahiru urte daramatzate eskaerarekin, eta aurreko legegintzaldian udalaren baiezkoa jaso ostean, zain jarraitzen dute. Hori dela eta, Karlos I.aren inguruko atarietan ehun kartel jarri dituzte bizilagunei jakinarazteko beste eskaera bat egin dutela.
“Radarra oso garrantzitsua da guretzat. Lehenik, segurtasunagatik. Errepidea egunero gurutzatzen dugu auzotarrok, eta bereziki, haur askok. Bigarrenik, trafikoa moteltzeko. Autobusak ziztu batean igarotzen dute hiribidea. Eta hirugarrenik, kutsadura akustikoa gutxitzeko”, azaldu du Xabier Berridi auzo elkarteko kideak.
Irailaren 23an Pilar Arana mugikortasun zinegotziarekin elkartu ziren, eta udalak radarra jartzeko asmoari eusten ziola jakinarazi zien. Duela hiru bat aste, Maria Jesus Idoeta auzoetako zinegotziak ere baieztatu zien radarraz ez zirela ahaztu, eta lanean jarraitzen zutela. Ordea, kezkatuta daude auzo elkartekoak hirian beste radar batzuk jarri diren bitartean, Karlos I.a hiribidekoa ez dutelako jartzen. “Atzerapenaren arrazoia omen da erakundeak ez direla ados jartzen. Errepidea aldundiarena da, eta radarra jartzeko baimena Jaurlaritzak eman behar du. Irtenbiderik ez dagoela dirudi, eta udalari berriz eskatu diogu radarra jartzeko”, azpimarratu du Berridik.
Udalak 30.000 euro ditu gordeta Karlos I.a hiribidean radarra jartzeko, baina oraindik ez ditu erabili. “Radarra jarri orduko berreskuratuko lukete inbertsioa, hiribidean ibilgailuak azkarregi ibiltzen direlako”.
