Realak gora egin nahi du sailkapenean
(Argazkia: Reala)
Realak gora egin nahi du sailkapenean. Horregatik, igandeko partida irabazten saiatuko dira, Espanyolen aurka. Une honetan bosgarren postuan dago Natalia Arroyoren taldea, baina partida bat gutxiago jokatu dute. Hain zuzen, Rayo Vallecanoren aurkako partida, lehen jardunaldikoa, atzeratu behar izan zuten. Partida hori asteazkenean izango da.
Realeko mutilek, berriz, Alavesen kontrako derbia dute igandean, Mendizorrotzan. Alaves hamairugarrena da sailkapenean, Vila-realen kontrako berdinketaren ondoren, Imanol Alguacilen mutilek Gasteizen irabazi nahi dute, etxetik kanpoko bolada onari segida eman, eta sailkapenaren lehen postuan jarraitzeko. Baja garrantzitsu batekin egin beharko diote aurre: Oiartzabal lesionatu egin zen atzoko partidan, eta, Realak jakinarazi duenaren arabera, bi eta lau partida artean galduko ditu.
Belar hockeyan, Realeko neskak zelaira itzuliko dira. Joan den astean ezin izan zuten jokatu, SPV aurkariak hainbat positibo zenbatu baitzituen taldean. Aste honetan, berriz, Getxora bidaiatuko dute, Jolasetaren kontra jokatzeko. Partida irabaztea ezinbestekoa da Jorge Perezen taldearentzat, sasoi honetan ez baitute garaipenik lortu oraindik. Bizkaitarrak azkenak dira, eta Reala atzetik hasita hirugarren. Aurten hiru talde jaitsiko dira B mailara, beraz, garrantzitsua izango da orain arteko boladari buelta ematea.
Saskibaloian ere derbia izango da. Gipuzkoa Basketek Baskoniaren kontra jokatuko du. Erronka zaila beste behin donostiarrentzat. Orain arte partida bakarra irabaztea lortu dute, eta azkenak dira ligan. Ibaeta Basketi dagokionez, Teneriferaino bidaiatuko dute, Ciudad de la Laguna Teneriferen aurka aritzeko. Partida irabaziz gero, Erreginaren Koparako sailkatuko dira.
SASKIBALOIA
Emakumezkoen lehen maila, 13. jardunaldia
Ciudad de la Laguna Tenerife – Ibaeta Basket (Igandea, 21:00)
ACB liga, 13. jardunaldia
Baskonia – Gipuzkoa Basket (Igandea, 18:00)
FUTBOLA
Gizonezkoen lehen maila, 12. jardunaldia
Alaves – Reala (Igandea, 21:00)
Emakumezkoen lehen maila, 10. jardunaldia
Reala – Espanyol (Igandea, 16:15)
BELAR HOCKEYA
Emakumezkoen lehen maila, 11. jardunaldia
Jolaseta – Reala (Larunbata, 17:30)
