50 koronabirus kasu positibo berri Donostian
Hiriko intzidentzia metatua 400,77koa zen atzo, eta auzo batek ere ez du gainditzen 100.000 biztanleko 500 kasuen langa.
Datuei erreparaturik, bihar ostalaritzak ateak aise zabalduko ditu. (Argazkia: Beñat Parra) 
Donostian, koronabirusaren kutsatze mailak beheranzko joerari eutsi dio beste behin. Atzo, 50 koronabirus kasu atzeman zituzten, eta intzidentzia metatua 400,77koa zen hirian. Duela bi egun, 438,2koa zen, eta duela hiru 471,78koa. Donostiak asteartean utzi zion gune gorri izateari, eta datuei erreparaturik, bihar ostalaritzak ateak aise zabalduko ditu. Izan ere, Aholku Batzordeak ezinbestekotzat jo du udalerria 100.000 biztanleko 500 kasuen langaren azpitik izatea tabernak eta jatetxeak irekitzeko.
Intzidentzia metatuak proportzio bat neurtzen du; alegia, zenbat pertsona berri gaixotu diren azkeneko hamalau egunetan zati zenbat pertsona osasuntsu zeuden periodo horren hasieran; ondorioz, birusaren kutsatzen abiadura erakusten du. Jaurlaritzaren irizpideen arabera, zifra hori 500dik gorakoa denean, leku hori gune gorria dela esan nahi du, alegia, kutsatze maila altua dela leku horretan.
Horrekin batera, duela hiru egun bidalitako ohar batean, Osakidetzak azaldu zuen COVID-19 positiboak zenbatzeko orain arte erabili dituen neurketa-irizpideak aldatu egingo dituela. Izan ere, antigeno-testen bidez lortutako positiboak ez ziren zenbatzen ospitaleratze-datuetan, eta ondorioz, benetako kasuak baino zenbaki baxuagoak eman ditu.
Kutsatze intzidentzia osasun eremuka
Une honetan, auzo batek ere ez du gainditzen 100.000 biztanleko 500 kasuen langa. Langa horren azpitik dago Loiola atzotik. Jarraian, bakoitzeko intzidentzia metatua ikus daiteke:
- Loiola: 434,97
- Ondarreta: 422,11
- Parte Zaharra: 391,33
- Bidebieta: 386,69
- Amara Berri: 384,27
- Intxaurrondo: 373,23
- Gros: 369,10
- Egia: 348,06
- Amara-Erdialdea: 319,70
- Altza-Roteta: 300,04
Kasu positibo kopuruari erreparatuz, jarraian ikus daitezke atzoko zifrak:
- Ondarreta: 10
- Altza-Roteta: 9
- Amara Berri: 9
- Amara-Erdialdea: 7
- Gros: 6
- Bidebieta: 3
- Egia: 3
- Parte Zaharra: 2
- Intxaurrondo: 1
- Loiola: 0
