Intxaurrondoko zentroan gizarte bazterketa egoeran daudenei otorduak emango dizkiete
Intxaurrondoko gizarte zentroa, Zarategi pasealekuaren atzean dago. 
Donostiako Udalak onartu du Intxaurrondoko gizarte zerbitzuen zentroan eskaintzen duten Otorduak programarako kontratua. Gizarte bazterketa egoera larrian dauden pertsonei eta familiei zuzenduta dagoen janaria prestatzeko eta entregatzeko zerbitzua da, eta Gizarte Ekimeneko Zentro Bereziei eta Lanerako Zentroei gordetakoa.
Kontratuaren helburua da, egunean gutxi gorabehera eta beharren arabera 25 menu prestatzea, eta plater bakoitza modu indibidualean ontziratuta ematea. Boluntarioek gizarte bazterketa egoera larrian dauden pertsona zein familiei emango diete.
Aurreikusten den gehienezko aurrekontua 43.161 eurokoa da, non ontzi bakoitzaren prezioa 4,73eurotakoa den. Kontratua gauzatzeko epea bi urtekoa da kontratua formalizatzen denetik, urtebeteko iraupena izango duten bi balizko luzapenekin.
