Ttan Ttakun irratiko festa Txondorra gunean izango da
2021ean festa ez da Gazteszenan izango, baina programazioari eutsi diote. (Argazkia: Makoki) 
Egiako Ttan Ttakun irrati libreak urteroko ohitura mantentzea erabaki du, baina aldaketa nabariekin. Irratiaren festa urtarrilaren 9an izango da, baina Egiako Txondorra kultur gunean. Hiru emanaldi programatu dituzte, eta egun horretan irratsaio berezia eskainiko dute 16:00etatik 21:00etara. Elkarrizketak, hausnarketak eta aipaturiko zuzeneko emanaldiak emitituko dituzte.
Mikel Karton abeslaria izango da jotzen lehena, 16:30etik aurrera. Ondoren, Tri Do Portu taldea ariko da 18:00etan, eta, azkenik, Eli eta Manex Pagola bikoteak kontzertua emango du 19:30ean.
Emanaldi bakoitzak 3 euro balio ditu, eta erreserbak ttanttakunirratia@gmail.com helbide elektronikoan eta 688 804 648 telefonoan egin daitezke. Egunean bertan ere aukera legoke lekua egongo balitz, edukiera mugatua delako. Zero eserlekuaren figura ere erabili daiteke, irratiari doaintza egiteko, 3 euro, edo borondatea bidali daiteke Bizum bidez 688 804 648 telefonora.
Eguneko programazioa 107.2 FM-an eta www.ttanttakun.eus webgunean entzun ahal izango da. Gainera, aurten, Sutan Bang kolektiboko kideen bitartez zuzeneko horiek ere bideo bidez emango dituzte.
