Wong Kar Zai zuzendariaren As Tears Go By filma emango du Kresala zineklubak Trueban
As Tears Go By filmaren irudi bat. Bigarren aldiz, Wong Kar Wai Hong Kongo zuzendariaren film bat emango dute Kresala zineklubeko kideek Trueba zineman. Kasu honetan, zuzendariaren lehen lana da proiektatuko dutena, 1988ko “As Tears Go By” filma.
Lehenengo emanaldiak izan zuen harrera ona ikusita, Kresalako kideek bitan emango dute film hau. Bi emanaldiak datorren asteartean izango dira Trueba zineman; bata, lehenengo aretoan 18:45tan, eta bestea bigarren aretoan, 19:15etan. Lehen saioan filma aurkeztu eta solasaldia egingo dute ikusi aurretik, eta bigarrenean aurkezpena egin ostean filma ikusiko dute zuzenean.
As Tears Go By
Film honek mafia txinatarrean sartzen diren bi anairen istorioa kontatzen du; gazteena etengabean sartzen da istiluetan, bere izaera dela eta. Anaia nagusia, berriz, maiteminduta dago, eta mundu horretatik atera nahi du, baina ez du anaia bertan utzi nahi.
