Muebles Eceiza saltokia eta haren eraikina babesteko eskatu du Ancorak
Muebles Eceiza saltoki historikoa Gipuzkoa plazako 2. zenbakian dago. (Argazkia: Ancora) 
Ancora Ondarearen Babeserako Elkarteak eskatu du Gipuzkoa plazako Muebles Eceiza saltoki historikoa eta haren eraikina babesteko, eta herritarrak aldarrikapenarekin bat egitera deitu ditu. Elkarteak salatu du eraikinaren barruko partea bota egingo dutela: “XIX. mendeko egurrezko egitura hormigoizko batengatik ordezkatuko dute. Espazioaren banaketa aldatuko dute eta ustiapena areagotuko dute, lur azpiko solairu berri bat eginez, hamabost etxebizitza, hamabost trasteleku eta hamazazpi aparkaleku plaza lortu arte”.
Eraikina 1867an eraiki zuen Jose Antonio de Segura obra maisuak, aldundiaren eraikinaren eta plazako lorategiarekin batera. Horregatik, Ancorak nabarmendu du “desegokia” dela eraikinean egingo duten esku hartzea.
Ildo horretatik, eraikinaren beheko aldeko Muebles Eceizaren (1868an sortua) eraisketa “bereziki tristea” dela salatu du Ancorak: “Gaur egungo lokalak, Ramon Cortazarrek 1919an diseinatutakoak, balio historiko arkitektoniko nabaria du. Leihoaren irekidura etorkizuneko garajerako sarrera gisa erabili nahi dute, marmol arrosa eta zuria duen estaldura kendu ondoren, pilastrak, kapitelak eta brontzea kenduta. Barrualdean boiserie bat, igeltsuzko moldura dotoreak eta Errenazimentuko inspirazioko zutabeak daude. Atzean, eskailera neo-euskaldun dotorea eta haritz hostoz landutako habeak, estetika bera jarraituz. Hori guztia auto igogailu prosaiko batean bihurtuko da”.
Azpimarratu dute kanpoko marmola eraikinari emango dioten erabilera berriarekin “erabat bateragarria” dela, eta udalari eskatu diote “gutxienez” hori mantentzeko. Era berean, aldarrikapenak indarra hartzeko, herritarrei eskatu diete eskakizun bera egiteko udalari, iradokizunak egiteko ematen duen aukeraren bidez.
