Bilbao Basket jasoko du Gipuzkoa Basketek larunbateko derbian
(Argazkia: Gipuzkoa Basket) Azken postuak atzean uzteko borrokatuko dute bi euskal taldeek Illunben; izan ere, sailkapeneko azken bi postuetan daude Gipuzkoa eta Bilbao Basket, 10 eta 8 punturekin, hurrenez hurren. Donostiarrek aukera bikaina dute jaitsiera postuetatik ateratzeko, hamazazpigarren postuan Betis dagoelako, puntu berdinekin. Bilbotarrek garaitu ezkero, Gipuzkoa Basket berdinduko lukete sailkapenean, nahiz eta partida bat gehiago jokatu duten beltzek. Partida honetaz gain, hamalau gehiago ditu aurretik Gipuzkoa Basketek denboraldia amaitu arte, eta gogor borrokatu beharko dute jaitsiera ekiditeko.
Saskibaloiarekin jarraituz, Ibaeta Basketek Kanaria Handia jasoko du larunbatean. Arerio zuzenak dira hamaikagarren eta hamabigarren baitaude sailkapenean, 35 punturekin biak. Ibaeta Basketek, baina, bi partida gutxiago jokatu ditu, eta aukera bikaina du playoff postuetan sartzeko. Cadi La Seu talde katalana da playoff postuetan azkena, 37 punturekin.
Futbolean, Realaren bi taldeek Real Madrilen aurka jokatuko dute. Neskek igandean jokatuko dute Zubietan, eta mutilek astelehenean, Di Stefano zelaian (Madril). Natalia Arroyoren neskek aukera bikaina dute Txapeldunen Ligaren aurreko faseko txartela ematen duten postuetara gerturatzeko, baina Real Madril denboraldi bikaina egiten ari da bere lehen denboraldian. Mutilek, berriz, azken urteetako Real Madril ahulenaren aurka jokatuko du Madrilen, eta bosgarren postuan egonkortzeko ezinbestekoa dute partida honetatik puntuak eskuratzea.
Bera Berak Zuazoren aurkako derbia jokatuko du igande honetan, Donostian. Bera Berak nahiko bermatuta du hurrengo faserako sailkapena, baina joan den aste osoa konfinatuta eman ostean, galdutako entrenamendu horien pisua nabaritu dezakete.
Belar hockeyan, Realeko neskek igandean jokatuko dute Terrassaren aurka Katalunian. Hamalau punturekin, bederatzigarren postuan da Reala, eta Terrassa bi postu gorago dago, hamaseirekin. Izotz hockeyan, berriz, Txuri Urdineko neskek igandean izango dute haien partida Logroñoko Milenio Panthersen aurka.
Partidak:
FUTBOLA
Emakumezkoen Lehen Maila, 19. jardunaldia:
Reala – Real Madril (Igandea, 12:00, ETB-1en)
Gizonezkoen Lehen Maila, 25. jardunaldia:
Real Madril – Reala (Astelehena, 21:00)
SASKIBALOIA
Emakumezkoen Lehen Maila, 25. jardunaldia:
Ibaeta Basket – Kanaria Handia (Larunbata, 19:15)
Gizonezkoen Lehen Maila, 22. jardunaldia:
Gipuzkoa Basket – Bilbao Basket (Larunbata, 20:45)
ESKUBALOIA
Emakumezkoen Ohorezko Maila, 11. jardunaldia:
Bera Bera – Zuazo (Igandea, 12:10)
BELAR HOCKEYA
Emakumezkoen Ohorezko Maila, 14. jardunaldia:
Terrassa – Reala.
IZOTZ HOCKEYA
Emakumezkoen Hockey Liga, 18. jardunaldia:
Txuri Urdin – Milenio Panthers (Igandea, 14:30)
