Jon Troitiño preso donostiarra Logroñora hurbilduko dute
Sareren manifestazio bat, Donostian. (Argazkia: Nerea Lizarralde) 
Espainiako Gobernuak beste sei euskal preso lekualdatuko ditu, horietako bat donostiarra: Jon Joseba Troitiño Ciria. Murtzia II espetxean dago gaur egun donostiarra, Euskal Herritik 820 kilometrora; Logroñoko kartzelara lekualdatuko dute, Euskal Herritik 170 kilometrora. 40 urteko kartzela zigorra ezarri zioten 2010ean, eta 2040an beteko ditu zigorraren hiru laurdenak.
Bestalde, lekualdatuko dituzten beste bost presoen artean Irati 3 urteko haur motxiladunaren gurasoak daude: Beatriz Etxeberria Caballero eta Iñigo Zapirian Romano. Aranjuezko espetxetik (Madril, Espainia, 450 kilometro) El Duesora eramango dituzte (Kantabria, Espainia, 170 kilometro). Horietaz gain, Jurdan Martitegi Lizaso Madrildik (430 kilometro) Donostiara ekarriko dute, Martuteneko espetxera; Asier Badiola Lasarte Valentziatik (600 kilometro) El Duesora gerturatuko dute eta Harriet Iragi Gurrutxaga Castello IItik (480 kilometro) Logroñora eramango dute.
Era berean, joan den astean iragarri zituzten presoen lekualdatzeen artean aldaketa bat izan da. Hain zuzen, Asier Karrera Arenzana presoa Dueñastik (310 kilometro) Zaballara (Araba) eramatekoak ziren, baina, azkenean, Donostiara ekarriko dute, Martuteneko kartzelara. Bestalde, joan den astean bi preso donostiar lekualdatu zituzten: Josu Ordoñez eta Mikel San Argimiro.
