Realak Sevillaren aurka jokatuko du Anoetan
2019ko Sevillaren eta Realaren arteko partida bat. Realaren mutilen taldeak ligako laugarren sailkatuaren aurka jokatuko du igandean Anoetan, Julen Lopetegi asteasuarraren Sevillaren aurka. Zortzi partida geratzen zaizkio ligari amaitzeko, eta Realak emaitza onak lortu beharko ditu Europa Ligarako txartela eskuratzeko. Bosgarren daude txuri-urdinak, baina Vila-real eta Betis oso gertu daude: Betisek puntu berdinak ditu, eta Vila-realek bat gutxiago. Oraingoz, ligako bosgarren postuak emango du Europa Ligarako txartela, baina faktore ezberdinek aldatu dezakete sailkapena; zehazki, kopako finalak eta Europa Ligako finalak. Bartzelonak kopa irabazi ezkero, seigarrena ere Europa Ligara sailkatuko da, eta zazpigarrenari emango zaio Conference Leaguerako txartela. Bestalde, Vila-realek Europa Liga irabazi ezkero, eta liga lehen sei postuetan amaitu ezkero, Txapeldunen Ligara sailkatuko dira horiak, eta zazpigarren sailkatuak ere Europa Liga jokatuko luke.
Bestalde, nesken taldeak Logroñoren aurka jokatuko du Zubietan. Txapeldunen Ligako txartela ematen duten postuetatik gertu daude txuri-urdinak, baina zaila izango dute Europako txapelketa nagusia jokatzea. Bosgarren dago Reala, eta hirugarren postuan Real Madril dago, sei puntu gehiagorekin. Atzean, Tenerifek Realak adina puntu ditu, 47, baina kanariarrek partida bat gutxiago jokatu dute.
Saskibaloian, Gipuzkoa Basketek Aragoira egingo du bidaia, Basket Zaragozaren aurka jokatzeko. Azken postuan dago Gipuzkoa Basket, eta oso zaila izango dute beste urtebetez lehen mailan jokatzea.
Belar hockeyan, Realak ligako azken aurreneko partida du Donostian, SPV Complutenseren aurka. Hamabi taldez osatutako ligan bederatzigarren da Reala, 22 punturekin, eta lehen mailari eusteko azken bi partidetako bat gutxienez irabazi beharko du. Azken partida azken sailkatuaren aurka jokatuko du datorren asteburuan, RC Jolasetaren aurka.
Partidak:
FUTBOLA
Gizonezkoen Ligako 31. jardunaldia
Reala – Sevilla (Igandea, 14:00)
Emakumezkoen Ligako 26. jardunaldia
Reala – Logroño (Larunbata, 12:15)
SASKIBALOIA
Gizonezkoen Lehen Maila, 30. jardunaldia
Basket Zaragoza – Gipuzkoa Basket (Igandea, 20:00)
BELAR HOCKEYA
Emakumezkoen Lehen Maila, 21. jardunaldia
Reala – SPV Complutense (Igandea, 11:00)
