Playoff fasera sailkatu da Sanse
Sanseko jokalariak gol bat ospatzen. (Argazkia: Reala) Realaren bigarren taldeak, Sansek, playoff fasera sailkatzea lortu zuen atzo Tudelano garaitu ostean. Galtzen hasi ziren txuri-urdinak, baina bigarren zatian esnatu egin ziren Xabi Alonsoren jokalariak, eta hamabi minututan hiru gol egitea lortu zuten. Alex Solak, Alkainek eta Karrikaburuk egin zituzten golak, baina Tudelanok partida amaierari emozio gehiago eman zion, 92. minutuan 3-2koa sartu baitzuen. Hala ere, Tudelanok ez zuen nahikoa izan, eta Sansek eraman zituen hiru puntuak.
Hiru partida geratzen zaizkie txuri-urdinei igoera fasea amaitzeko, baina playoff fasean arituko dela matematikoki ziurtatu du. Hamasei talde izango dira playoff fasean, eta lauk lortuko dute bigarren mailan lekua.
Bigarren B mailaren azken urtea da hau, eta sailkapena berezia izan da aurtengoa. Datorren denboraldian RFEF 1. maila izango da, eta hirugarren maila RFEF 2. maila deituko da. Aurten, lau talde beharrean bost talde izan dira Bigarren B mailan, bi azpitaldetan banatuta. Hamar taldez osatutako azpitalde hauetako hiru onenak sailkatu dira igoera fasera. Igoera fasean bost taldeetako azpitalde bakoitzeko hiru onenak elkartu dira, seiko ligatxo batean. Bakoitzeko hiru onenak eta guztietatik laugarren onena sailkatuko dira playoff fasera.
