Rafael Berrioren bost disko zozkatuko ditu Giorgio Bassmatti musikariak
Rafael Berrio. (Argazkia: Nerea Lizarralde) 
Giorgio Bassmatti musikari donostiarrak Rafael Berrioren omenezko zozketa bat antolatu du, eta haren bost disko zozkatuko ditu parte-hartzaile guztien artean. Hain zuzen, igandean Berrioren omenezko kontzertu berezia eskaini zuten Le Bukowski aretoan Bassmattik eta beste hainbat musikarik, eta omenaldiak zaleengandik izandako erantzun ona aintzat hartuta, zozketa egitea erabaki duela azaldu du musikariak bere webgunean: “Ez litzateke bidezkoa izango atzo jotzeagatik txalo formatuan eta formatu ekonomikoan jasotako guztia niretzat izatea. Hoberena omenentzen, bultzatzen eta gozatuarazten jarraitzea izango litzateke, kontzertuz beteriko arratsalde batetik edo bestetik harago. Horrela, […] Berrioren diskoen zozketa bat antolatzea erabaki dut”.
Zozketan parte hartu ahal izateko, Berrioren Bandcamp atarian sartu eta eskuratu nahi den diskoa aukeratu behar da, formatu digitalean edo fisikoan nahi den zehaztuta. Fisikoa eskatuz gero, formatu horretan ez badago, digitalean iritsiko zaio eskatzaileari. Behin diskoa aukeratuta, mezu elektroniko bat bidali behar da giorgio.bassmatti@gmail.com postara, eskatzailearen helbidea, izen-abizenak eta aukeratutako diskoaren izenburua eta formatua zehaztuta. Bassmattiren webguneko harremanetarako inprimakia beteta ere egin daiteke hori.
Eskaera guztien artean, zozketa egingo du Bassmattik, eta bost irabazle izango ditu zozketak. Horrela, bost pertsona horiei eskatu duten diskoa bidaliko die musikari donostiarrak. Zozketan parte hartzeko epea hilaren 27ko 17:00etan amaituko da.
