Joy Adams hegalekoa fitxatu du Ibaeta Basketek
“Joy Adams, botere fisikoa eta botere-aniztasuna Ibaeta Basketentzat”: hala aurkeztu du talde donostiarrak 2021/2022 denboraldirako fitxaketa berria. Joy Alexis Brown Adams (1993, Georgetown, Guyana) hegalekoa fitxatu dute, Kutxabank Araskin ibili ostean.
Amerikako Estatu Batuetako Ionako Unibertsitatean hasi zuen ibilbidea Adamsek, NCAA ligan. AEBetan ibili ostean, Europara etorri zen jokatzera, Oviedoko Unibertsitateko taldean. Partida onak egin zituen bertan, eta Espainiako Lehen Mailako Nissal Al-Qazeres taldeak fitxatu zuen. Handik Valentzia Basketera joan zen Adams, eta Eurocup txapleketan debuta egin zuen.
Joan den denboraldian Kutxabank Araskin ibili zen, eta bataz beste 8,5 puntu, 7,8 errebote eta 9,7ko balorazioa lortu zuen.
