12 koronabirus kasu positibo Donostian
Donostiako intzidentzia metatua 72,37koa da, eta behera egin du. Atzo koronabirus kasu kopurua nabarmen handitu zen, Mallorcara ikasketa bidaian joandako pertsona taldean izandako agerraldiarengatik.
(Argazkia: Beñat Parra) 
Eusko Jaurlaritzak argitaratu dituen datuen arabera, 12 koronabirus kasu positibo atzeman zituzten Donostian atzo. Une honetan, hiriko intzidentzia metatua 72,37koa da, eta behera egin du. Intzidentzia metatuak berriro ekin dio joera beherakor jarraia izateari, nahiz eta atzo gora egin zuen. Izan ere, 78,95koa zen intzidentzia metatua atzo, 72,37koa herenegun, eta 78,40koa zen astelehenean.
Atzo igo egin ziren Donostian atzemandako koronabirus kasu positiboak —24 ordutan, 6 kasutik 28ra pasa zen hiria—, eta Osakidetzak jakinarazi du Mallorcara ikasketa bidaian joandako pertsona taldean izandako agerraldiarengatik izan dela. Azaldu dutenez, agerraldi horrekin lotutako 49 positibo atzeman dituzte dagoeneko Donostian, eta COVID-19a diagnotikatzeko proba ugari egiten ari dira Bengoetxea kaleko osasun zentroan. Osakidetzak bidaira joandakoei eta haien gertukoei egingo dizkie probak, eta 250-300 pertsona artatzea aurreikusten dute, euren eta gainontzeko herritarren “osasuna eta segurtasuna bermatzeko”.
Intzidentzia osasun eremuka
Intzidentzia metatuak behera egin du sei osasun eremutan, eta gora egin du Ondarretan eta Egian; berdin mantendu da Bidebietan, Altza-Rotetan eta Loiolan:
- Ondarreta: 108,24
- Bidebieta: 97,13
- Intxaurrondo: 96,39
- Altza-Roteta: 71,45
- Amara Berri: 70,76
- Amara-Erdialdea: 58,76
- Aiete: 56,15
- Loiola: 54,51
- Egia: 47,34
- Gros: 33,77
- Parte Zaharra: 28,90
Kasu positibo kopuruari erreparatuz, jarraian ikus daitezke atzoko datuak:
- Ondarreta: 5
- Parte Zaharra: 2
- Amara Berri: 1
- Amara-Erdialdea: 1
- Altza-Roteta: 1
- Gros: 1
- Egia: 1
- Bidebieta: 1
- Loiola: 0
- Aiete: 0
- Intxaurrondo: 0
Indarrean dauden osasun neurriak
Ostiral arratsaldean bildu zen Labi batzordea, eta pandemiaren bilakaera positiboa dela eta, EAEn ostalaritzaren eta kultur jardueren itxiera ordua 00:00etatik 02:00etara aldatzea erabaki zuten. Bestalde, elkarte gastronomikoak irekitzea ere erabaki zuten batzordean, zortzi hilabete itxita eman ostean. Gainera, ekainaren 26tik aurrera ez da derrigorrezkoa izango kanpoaldean maskara erabiltzea.
Larunbatetik indarrean dauden osasun neurriak honakoak dira:
- Hego Euskal Herriko mugikortasuna librea da.
- Espainiako Estatuko gainontzeko autonomia erkidegoetara joan daiteke.
- Posible da edozein ordutan kalean egotea.
- Beste pertsona batzuekin elkartzea, kopuru mugarik gabe. Ostalaritza establezimenduetan, ordea, gehienez sei pertsona elkartu daitezke mahai bakoitzean.
- 02:00etan ostalaritza establezimenduak itxi behar dira, baita kultura, gizarte eta merkataritza jarduerak eten ere.
- Merkataritzan eta antzeko jardueretan %60koa da edukiera, baita terrazetan ere. Ostalaritza establezimenduen barnean %50ekoa da.
- Kirol ekitaldietan, sozialetan eta kulturaletan edukierak 600ekoak izango dira barruan, eta 800ekoak kanpoan. Guztira 1.600 eta 5.000 arteko pertsonako edukiera duten lekuetan, berriz, edukiera 800ekoa izango da gehienez barruan, eta 1.200ekoa kanpoan. Edukiera 5.000 pertsonatik gorakoa duten lekuetan, berriz, gehienezko edukiera %30ekoa izango da.
- Elkarte gastronomikoak eta txokoak ireki ahal izango dira, eta ostalaritzaren neurri berak errespetatu beharko dituzte. Hauen ordutegia 09:00etatik 02:00etara izango da, eta %50eko gehienezko edukiera izango dute.
- Kanpoan, taldean egiten den kirolak ez du pertsona kopuru gehienezkorik, eta barruan gehienez 10 pertsonakoak izango dira taldeak. Aldagelen edukiera %50era handituko da.
- Kanpoko turismo eta natura bisiten taldeak gehienez 20 pertsonakoak izango dira, eta barrukoak 10 pertsonakoak.
Txertaketa prozesua
Osakidetza hasi da 40 urte baino gutxiago dituzten pertsonei txertatzeko hitzordua ematen; zehazki, 1982. urtetik aurrera jaiotako pertsonei. Kolektibo horrek datorren astean jasoko du lehen dosia.
Izan ere, COVID-19aren aurkako txertoa jartzeko erritmoa azkartzen ari da, eta dagoeneko 40 eta 41 urte bitarteko pertsonak ari da txertatzen Osakidetza. Ekainaren 7an ekin zioten 40 eta 49 urte arteko pertsonak txertatzeari, zaharrenetik gazteenera, eta bi aste pasa eta gero, adin taldeko pertsona gazteenei txertoa jartzen ari dira.
Gainera, COVID-19ari kontrako txertoen dosi gehiago jaso ostean, txertaketa kanpainan beste pauso bat emateko erabakia hartu dute: 12 eta 39 urte bitartekoak txertatzea. Horrela, hiru adin talde berri sortu dituzte txertaketarako: 12-19 urte bitartekoak, 20-29 urte bitartekoak eta 30-39 urte bitartekoak. Zaharrenetik gazteenera txertatuko dute, orain arte egin duten moduan. Beraz, 30-39 urte bitarteko pertsonak hasiko dira txertatzen datorren astetik aurrera.
Bestalde, AstraZenecaren lehen dosia jaso duten 60 urte baino gutxiagoko pertsonak bigarren dosia jasotzen ari dira. Osasun agintariek pauta osatzeko Pfizerren txertoa jartzea gomendatu dute, baina AstraZenecarena hartu nahiko lukeenak horretarako aukera ere izango du, dokumentu bat sinatuta. 60 urtetik gorako pertsonei AstraZenecaren txertoaren bigarren dosia ematen aste honetan hasiko dira, gainera.
