Altzako kiroldegi berriaren ekipamendua kontratatzeko lehiaketa abiatu du udalak
Altzako kiroldegi berriaren igerilekuen infografia. 
Donostia Kirolak Altzako udal kiroldegi berrirako behar den ekipamenduaren hornidura kontratatzeko lizitazioa argitaratu du. Horrela, dena prest egongo da Obra eta Proiektu sailak lanen fasea bukatzen duenean, eta kiroldegia ahalik eta lasterren ekipatu ahal izango da instalazioa irekitzeko epea aurreratuz.
Kontratu honek lau ekipamendu sail ditu, eta berrikuntza batzuk dakartza udalaren beste kirol instalazio batzuetako ekipamenduarekin alderatuta. Lehenengo saila lehiatilena da, bai banakako erabiltzaileek erabiliko dituztenak, bai talde eta epaileek ere. Guztira, 400 armairu inguru egongo dira; horietatik 300 sarraila elektronikodun armairuak izango dira, eta Kirol Txartelarekin edo eskumuturrekoekin aktibatu ahal izango dira. Armairuen eremuan pantaila txiki batzuk egongo dira erabili den armairua kontsultatzeko. Guztira, 149.000 euroko aurrekontua du.
Bigarren sailak, 102.117 euroko aurrekontuarekin, bulegoetako altzariak, klubentzako lokalak, aulkiak, epaileentzako mahaiak eta abar hartzen ditu. Aldagelen eta igerilekuen ekipamendua da hirugarren saila, eta 79.739 euroko aurrekontua du. Altzako kiroldegiko igerilekua bereziki waterpoloan aritzeko diseinatuta dago, eta, beraz, kirol jarduera horrekin zerikusia duten elementuek garrantzi handia dute sail honetan. Hala, igeriketarako berariazko kortxo ilarez gain (Nazioarteko Federazioaren araudiaren arabera), waterpolorako berariazko kortxo ilarak, gainerako erabiltzaileak babesteko motordun sareak eta abar ere sartzen dira.
Azkenik, laugarren saila kirol pistetako ekipamendurako da. eta zenbateko handiena dauka; 199.045 euro guztira. Altzako kiroldegi berriak bi kirol pista izango ditu eta moduluetan bana daitezke, aprobetxamendua optimizatzeko. Horregatik, sail honetan hiru gortina motorizatu sartzen dira, aldi berean lau modulu izateko aukera ematen dutenak. Pista horiek FIBA lehiaketetarako ate eta saski ziurtatuak izango dituzte.
Berrikuntza garrantzitsuetako bat da bai igerilekuek bai pista nagusiak kirol anitzeko bi bideomarkagailu elektroniko izango dituztela, eta horiek, partidetarako markagailuaren funtzionaltasunaz gain, beste informazio eduki batzuk eskaintzeko aukera emango dute; hala nola, igerilekuko kaleen programazioa edo erabiltzaileentzat garrantzitsua den beste informazioak ere.
Gimnasioko makinetarako alokairua
Hurrengo egunetan, bost urterako gimnasioko makinen alokairuaren lizitazioa ere argitaratuko dute, 580.800 euroko aurrekontuarekin. Altzako udal kiroldegiak izango du hiriko gimnasio handienetakoa –500 metro karratu baino gehiago–, eta Donostia Kirolak alokairuaren formula erabiliko du kiroldegi horretako makinak hornitzeko. Formula berri horrek matxurak konpontzeko denbora hobetuko du, eta, gainera, konponketa denbora luzea denean, ordezko makinak instalatzea aurreikusten da. Gainera, alokairuak esan nahi du bost urtean behin gimnasioa erabat berrituko dela, gimnasioko makina eta elementu guztiak ordezkatuz.
Gimnasio honek lau alde izango ditu: indar lana makinekin, pisu libreko eremua, gune funtzionala eta luzaketak eta eremu kardiobaskularra. Guztira, 72 makina instalatuko dira, denak bluetooth konexioa eta USB atakarekin. Gainera, barra olinpikoak, 42 kilorainoko halterak, TRX, poleak, luzaketa-bankuak eta abar izango dira. Makina horien alokairua hilean 9.680 eurokoa izango da bost urtean, eta, ondoren, makina guztiak berritu egin beharko dira.
