Bitxikeriez betetako azoka egingo dute Txominen
Txomiñeneko Lanberri auzo elkarteak azoka txiki bat antolatu du datorren iganderako. 10:00etatik 14:30era izango da Txomiñeneko biribilgunearen ondoan, Renfeko geltokiaren aurrean. Aire librean izango da eta ez da sarrerarik ordaindu beharko. Giroa alaitzeko Filipe Court Trio taldea zuzenean ariko da 12:00etatik aurrera.
Orain dela urte batzuk antolatu zuen auzo elkarteak Gabonetako Azoka kultur etxean. Arrakasta izan zuenez, ondorengo urteetan antolatzen jarraitu dute, baina beti Gabonetan. Aurten urte desberdina denez eta San Joan sua egitea posible izan ez denez, normaltasun pixka bat sentitzeko esperoan antolatu dute azoka hau.
Askotariko postuak egongo dira: izozkiak, eskuzko osagarriak, haurrentzako arropak, etxe apainketak eta abar. Esaterako, Pintxiena, Belarri Tako, Discos Vintage, Minimilk, Leizuri izozkiak, Baby Mundua eta beste hainbat.
