Donostia eremu gorrian sartu da gaur
Donostian 90 koronabirus kasu positibo atzeman zituzten atzo, eta une honetan, hiriko intzidentzia metatua 436,43koa da: gora egin du.
Grosen behera egin du intzidentzia metatuak. (Argazkia: Beñat Parra) 
Eusko Jaurlaritzak argitaratu dituen datuen arabera, Donostian 90 koronabirus kasu positibo atzeman zituzten atzo. Une honetan, hiriko intzidentzia metatua 436,43koa da, eta gora egin du. Izan ere, 398,59koa zen intzidentzia metatua atzo, 375,57koa zen herenegun, eta ostiralean, 314,71koa. Donostia eremu gorrian sartu da gaur. Orain dela hiru aste hasi zen igotzen intzidentzia, besteak beste, Mallorcako agerraldiaren ondorioz. Horrez gain, Deustuko Unibertsitateak aurreko astean jakinarazi zuen 30 ikaslek koronabirusa hartu zutela udako ikastaro batean.
Intzidentzia osasun eremuka
Atzoko datuekin konparatuta, intzidentzia metatuak gora egin du hamar osasun eremutan, eta Grosen behera egin du:
- Ondarreta: 507,36
- Aiete: 433,18
- Gros: 374,85
- Amara Berri: 412,27
- Intxaurrondo: 394,32
- Amara-Erdialdea: 528,83
- Altza-Roteta: 321,51
- Loiola: 258,93
- Parte Zaharra: 397,40
- Egia: 344,92
- Bidebieta: 249,76
Kasu positibo kopuruari dagokionez, honakoak dira atzoko datuak:
- Amara Berri: 14
- Gros: 8
- Ondarreta: 15
- Egia: 6
- Parte Zaharra: 10
- Aiete: 5
- Loiola: 2
- Amara-Erdialdea: 13
- Altza-Roteta: 12
- Bidebieta: 5
- Intxaurrondo: 6
Txertaketa prozesua
Osakidetzak ostiralean ireki zuen 16 eta 29 urte arteko gazteak txertatzeko atea. Bestalde, 40 urte baino gutxiago dituzten pertsonei txertatzeko hitzordua ematen ari dira, lehen dosia jaso dezaten. Era berean, 12 eta 17 urte arteko ikasleak ikasturtea hasi aurretik txertatzen hasteko baimena eman du EMA Sendagaien Europako Agentziak, eta Eusko Jaurlaritzak gazteen txertaketa aurreratzeko eskatu du.
Bestalde, AstraZenecaren lehen dosia jaso duten 60 urte baino gutxiagoko pertsonak bigarren dosia jasotzen ari dira. Osasun agintariek pauta osatzeko Pfizerren txertoa jartzea gomendatu dute, baina AstraZenecarena hartu nahiko lukeenak horretarako aukera ere izango du, dokumentu bat sinatuta.
Indarrean dauden osasun neurriak
- Segurtasun distantziak mantentzerik badago, kanpoaldean ez da derrigorrezkoa maskara erabiltzea.
- Hego Euskal Herriko mugikortasuna librea da.
- Espainiako Estatuko gainontzeko autonomia erkidegoetara joan daiteke.
- Posible da edozein ordutan kalean egotea.
- Beste pertsona batzuekin elkartzea, kopuru mugarik gabe. Ostalaritza establezimenduetan, ordea, gehienez sei pertsona elkartu daitezke mahai bakoitzean.
- 02:00etan ostalaritza establezimenduak itxi behar dira, baita kultura, gizarte eta merkataritza jarduerak eten ere.
- Merkataritzan eta antzeko jardueretan %60koa da edukiera, baita terrazetan ere. Ostalaritza establezimenduen barnean %50ekoa da.
- Kirol ekitaldietan, sozialetan eta kulturaletan edukierak 600ekoak izango dira barruan, eta 800ekoak kanpoan. Guztira 1.600 eta 5.000 arteko pertsonako edukiera duten lekuetan, berriz, edukiera 800ekoa izango da gehienez barruan, eta 1.200ekoa kanpoan. Edukiera 5.000 pertsonatik gorakoa duten lekuetan, berriz, gehienezko edukiera %30ekoa izango da.
- Elkarte gastronomikoak eta txokoak ireki ahal izango dira, eta ostalaritzaren neurri berak errespetatu beharko dituzte. Hauen ordutegia 09:00etatik 02:00etara izango da, eta %50eko gehienezko edukiera izango dute.
- Kanpoan, taldean egiten den kirolak ez du pertsona kopuru gehienezkorik, eta barruan gehienez 10 pertsonakoak izango dira taldeak. Aldagelen edukiera %50era handituko da.
- Kanpoko turismo eta natura bisiten taldeak gehienez 20 pertsonakoak izango dira, eta barrukoak 10 pertsonakoak.
