Realak denboraldiko lehenengo garaipena bilatuko du igandean Anoetan, bere zaleen aurrean
Realaren lehenengo taldeak Anoetan jokatuko du, eta bigarrenak, aldiz, Galizian. Bestalde, Donostiarra Ondarroako eta Hondarribiako uretan lehiatuko da asteburuan. Eskubaloian, Bera Berak Summer BAG txapelketa jokatuko du.
Alexander Isak, Zubimendi eta Barrenetxea, gol bat ospatzen. (Argazkia: Reala) 
Realzaleak joan den asteburuan itzuli ziren Anoetako harmailetara, Sanseren partida ikustera, baina lehenengo taldeak asteburu honetan jokatuko du zaleen aurrean Anoetan, urte eta erdian estreinakoz. Ligako lehenengo jardunaldian Bartzelonaren aurka galdu ostean, Imanol Alguacilen mutilek denboraldiko lehenengo garaipena bilatuko dute Rayo Vallecanoren aurka, igandean (hilak 22), 17:00. Bestalde, Sansek ondo hasi zuen joan den asteburuan bigarren mailako ibilbidea, eta bide horretatik jarraitzea bilatuko dute Xabi Alonsoren mutilek Lugoren aurka Galizian. Partida bihar, hilaren 21ean, izango da, 17:00etan.
Arraunean, Arraun Lagunakek joan den asteburuan liga irabazi ostean, neskak ez dira lehiatuko aste honetan, baina mutilak bai. Hain zuzen, Donostiarrako arraunlariak Ondarroako uretan arituko dira bihar, 18:13ean. XXXVII. Ondarroako Banderaren bila joango da Donostiako taldea, eta ligako hirugarren sailkatua denez, onenen txandan aterako da; ohorezko txandan hain zuzen, Zierbenarekin, Santurtzirekin eta Hondarribiarekin batera. Ondoren, igandean, Hondarribiako uretan lehiatuko dira, 12:13ean, Hondarribiko XXXIV. Banderan.
Eskubaloian, Bera Berak arrakastaren bidetik jarraitzea bilatuko du Valladoliden jokatuko den Summer BAG txapelketaren hirugarren edizioan. Donostiarrak jokalari guztiekin joango dira Valladolidera, eta gaur arratsaldean jokatuko dute finalerdietako partida, Atletico Guardesen aurka, 18:30ean.
