Bera Berak Granollersko txapelketa irabazi du
Bera Berak asteartean jokatu zuen Granollersko txapelketa. (Argazkia: Bera Bera) 
Bera Bera eskubaloi talde donostiarrak Granollersko (Herrialde Katalanak) txapelketa jokatu zuen atzo, eta garaipenarekin itzuliko da Donostiara, 23-30 irabazi baitzion etxeko taldeari. Granollers maila ona duen talde bat da, baina hainbat jokalari falta zitzaizkion, eta nabaritu egin zuen.
Izan ere, lehenengo minututik nagusi izan ziren Imanol Alvarezen neskak, eta arazo handirik gabe gailendu ziren. Joan den astean Valladoliden egin zuen moduan, Alvarezek bere hamalau jokalariei minutuak eman zizkien, ligaren hasierara begira denak probatzen joateko.
Bera Berakoak oraindik ez dira Donostiara itzuli, bidaia aprobetxatuta, Handbol Sant Quirzerren aurka jokatuko baitute gaur, hilaren 25ean, 18:30ean.
