Donostiarra ligako hirugarren postuari eustera joango da Bermeoko eta Portugaleteko uretara
Donostiarra KAE-1 ligako estropada batean. (Argazkia: Oscar Oliva) 
Donostiarrako mutilek asteburu honetan bukatuko dute liga, Bermeoko eta Portugaleteko banderekin. Ligako hirugarren sailkatua da Donostiako taldea, baina Oriok gertutik jarraitzen dio, eta, beraz, hirugarren postuari eusteko ahaleginak egingo dituzte Donostiarrako arraunlariek. Kontxako Banderan ondo lehiatu ostean, indarberrituta helduko dira Donostiarrakoak Bizkaira. Larunbatean Bermeoko uretan lehiatuko dira, eta igandean Portugaleten; Bermeoko estropadaren ondoren sailkapen orokorreko taldeen arteko desberdintasuna hiru puntukoa edo gutxiagokoa bada, Portugaletekoa erlojuaren aurkako estropada izango da. Tartean, igoera eta jaitsiera play off-ak jokatuko dituzte.
Futbolean, Realeko mutilek Sevillaren aurka jokatuko du Anoetan igandean, 16:15ean. Imanol Alguacilen taldeak ligako goiko postuetan jarraitzea bilatuko du beste garaipen batekin. Gainera, Sevilla garaitzea garrantzitsua izan daiteke denboraldi amaierara begira, Europako postuetarako lehiakide zuzena baita. Bigarren taldeari dagokionez, aurkari zuzen baten aurka jokatuko du: Zaragozaren aurka, La Romaredan. 18. sailkatua da Sanse, eta 19.a Zaragoza, beraz, Xabi Alonsoren mutilek aragoitarrekin tartea irekitzea bilatuko dute. Realeko neskek ez dute partidarik jokatuko asteburu honetan.
Eskubaloian, Bera Berak etxean jokatuko du larunbatean (18:00etan) Costa del Sol Malagaren aurka, eta ligako lehenengo postuari eustea bilatuko dute donostiarrek. Hain zuzen, andaluziarrak dira bigarrenak, beraz, partida garrantzitsua izango da biharkoa.
Bestalde, belar hockeyko denboraldia hasiko da asteburu honetan, eta Realak Egararen aurka jokatuko du igandean, etxetik kanpo. Liga ondo hasteko, garaipen baten bila joango dira txuri-urdinak.
PARTIDAK
Arrauna:
Gizonezkoen Euskolabel liga, azken jardunaldiak
- Bermeoko XXXIX. Bandera (larunbata, 18, 18:50ean).
- Portugaleteko XLVII. Bandera (igandea, 19, 12:30ean).
Futbola
Gizonezkoen lehenengo maila, 5. jardunaldia
- Reala – Sevilla (igandea, 19, 16:15ean).
Gizonezkoen bigarren maila, 6. jardunaldia
- Zaragoza – Reala B (larunbata, 18, 18:15ean).
Eskubaloia
Emakumezkoen lehenengo maila, 2. jardunaldia
- Bera Bera – Costa del Sol Malaga (larunbata, 18, 18:00etan).
Belar hockeya
Emakumezkoen ohorezko maila, 1. jardunaldia
- Egara – Reala (igandea, 19. Ordua zehaztu gabe dago).
