Kontadoreseko udazken eta neguko laborategietan izena emateko epea ireki dute
Dancehall ikastaroa emango dute Kontadoresen. 
Bidebietako Kontadores guneak hainbat ikastaro antolatu ditu 2021eko urritik 2022ko otsailera bitartean. Guztira 92 plaza eskainiko dira, bederatzi laborategi kulturaletan banaturik. Gazteen interesak, beharrak eta zaletasunak oinarri harturik osatu da Kontadoreseko laborategi proposamena, euren poltsikora egokitutako prezioekin. Hemen daude proposamenei, egutegiari, ordutegiei eta prezioei buruzko zehaztasunak. Aldiz, izena helbide honetan eman behar da.
Aurten arte eszenikoak eta sukaldaritza nabarmenduko dira, gorputza kokatuko da laborategien erdigunean eta gizartean bizi dugun egoerak eraginda sortu den beharrari erantzungo zaio: gazteentzat espazioak sortuz, gorputzetatik, mugimendutik, sorkuntzatik eta ongizatetik harremanak eraiki ditzaten. Bestalde, koronabirusaren krisia dela eta, Kontadoresek berezko protokoloa du gaixotasunaren hedapenaren aurrean arriskuak ekiditeko. Beraz, ezarritako segurtasun eta higiene neurriak jarraitu beharko dira une oro.
Parte hartzeko irizpideak
Oro har, gazteei espresuki zuzenduriko ikastaroak dira, 18-30 urte bitartekoei, hain zuzen ere eta lehentasuna izango dute Donostian erroldaturik dauden gazteak. Halaber, Laborategien eskaintza, aurretik aipatutako adin tarteari zuzendurik badago ere, 18 urtetik beherako eta 30 urtetik gorako pertsonek parte hartzeko aukera izango dute, euren partaidetzaren egokitasuna balioztatuz gero, eta plaza libreak egonez gero.
