Realak garaiezin jarraitzen du
Nerea Eizagirre eta Amaiur Sarriegi, azken horren goletako bat ospatzen. (Argazkia: Reala) 
Natalia Arroyoren taldea inoiz baino hobeto dago, eta edozein talde garaitu dezaketela dirudi, orain arte jokatutako ligako sei partidak irabazi baitituzte. Rayo Vallecanoren etxean jokatu zuten larunbatean, eta lehenengo minutuetan aurreratu ziren markagailuan txuri-urdinak: Franssik egin zuen 0-1-ekoa, 23. minutuan. Handik hiru minutura, tartea handitu zuten Arroyoren neskek, Amaiur Sarriegik bigarren gola egin baitzuen 26. minutuan, Nerea Eizagirreren pase bati esker. Etxekoek azkar erreakzionatu zuten, eta Bulatovicek 1-2-koa egin zuen 28. minutuan, baina Reala ez zen kikildu, eta Sarriegik hirugarrena sartu zuen 31. minutuan. Gol guztiak hamar minutu eskasetan egin zituzten, eta 1-3 amaitu zen neurketa. Reala ligako bigarren sailkatua da 18 punturekin, Bartzelonarekin berdinduta.
Belar hockeyan, Reala sentsazio onekin iristen zen larunbateko partidara, azken bi neurketan irabazi baitzituen. Ordea, txuri-urdinak ez ziren ondo atera zelaira, eta laster aurreratu zen Sanse Complutense. Donostiarrak berdinketaren golaren bila joan ziren, baina kanpoko taldeak bi gol sartu zituen bi minutu eskasetan, eta partida hor amaitu zen: 0-3. Txuri-urdinak ligako hirugarren sailkatuak dira orain.
Izotz hockeyan, Txuri Urdineko mutilek 3-4 irabazi zioten Nordic Vikings taldeari. Gaztelania ikasten ari diren ikasle suediar batzuek osatutako taldea da Nordic Vikings. Horrela, donostiarrak laugarren sailkatuak dira orain ligan.
Saskibaloian, Ibaeta Basketek hiru puntuak lortu zituen larunbatean bere etxean, Estudiantesen aurkako partidan. Hain zuzen, 65-51 gailendu ziren donostiarrak, eta ligako hamabosgarren sailkatuak dira orain. Garaipenaren bidetik jarraitu beharko dute sailkapenean gora egiteko.
EMAITZAK
Belar hockeya
Emakumezkoen ohorezko maila, 4. jardunaldia
Reala 0 – Sanse Complutense 3
Izotz hockeya
Gizonezkoen lehenengo maila, 4. jardunaldia
Nordic Vikings 3 – Txuri Urdin 4
Futbola
Emakumezkoen lehenengo maila, 6. jardunaldia
Rayo Vallecano 1 – Reala 3
Saskibaloia
Emakumezkoen lehenengo maila, 4. jardunaldia
Ibaeta Basket 65 – Estudiantes 51
