Auzoko eragileen arteko topaketa egin dute Amara Berriko Egunean
(Argazkia: Oihane Arretxea) Amara Berriko hainbat elkarte eta gizarte eragilek lehen Amara Berriko Eguna ospatuko dute gaur. Armeria plazan jarri dute gunea eta 10:00etan hasi da egitaraua, Amara Berri Egunaren aurkezpenarekin. Helburua topaketa bat egitea izan da, eragileek egiten dutena auzotarrei ezagutzera emateko eta euren artean elkar ezagutzeko eta informazioa trukatzeko. Guztira hemeretzi eragilek parte hartu dute eta bakoitzak informazio postu bat jarri du plazan.
Goiz osoan zehar, adin guztientzako kultur jarduerak egin dituzte. Besteak beste, txistulariak, euskal dantza emanaldia, bertsolariak, antzerki emanaldia, eta puzgarriak izan dira bertan. Horrez gain karpa txiki bat jarri dute, eta han bideoak proiektatu dituzte egitasmoan parte hartzen dutenen jarduerei buruzko informazioarekin, eta 10:30etan, auzotarrei auzoko gune publikoa aktibatzeko eta hobetzeko plana (EPAH) aurkeztu diete. Horrez gain, bi musika emanaldi izan dira. 10:40an Mugan taldea eta 11:00etan Banda Bi taldeak, kontzertua eskaini diete auzotarrei. Ondoren Itsaso Piquer eta Asier Ibargurenen bertso saio izan da. 13:00etan Amarako Bamboo dantza taldearen ikusikizuna izan da oholtzan. Kide batek azaldu duenez, Los Angeleseko (Estatu Batuak) hip hop dantza lehiaketa baterako klasifikatu dira eta bidaia finantzatu ahal izateko kamiseta eta jertseak saltzen ari dira. Amaitzeko, Goratzar abesbatza aritu da kantuan eta haien atzetik, Beñaranks-ek reggaea musikarekin girotu du plaza.
Parte hartu duten eragileak ondorengoak izan dira: Katalin Erauso ikastetxea, Ikasbide kultur elkartea, Amara Berri ikastetxeko gurasoen elkartea, Urrats euskaltegia, AEK euskaltegia, Amara Berriko auzo elkartea, Arcco merkatal gunea, zahar etxea, Easo Politeknikoa, Peñaflorida institutuko gurasoen elkartea, Amara Berri ikastetxea, Katalin Erausoko guraso elkartea, Ilunki elkartea, Superxagu jai batzordea, Berritsu euskara batzordea, Karmelo ikastetxea eta guraso elkartea, kaldereroen konpartsa eta auzoko gazte asanblada sortu berria.
