Berdinketa mingarria derbian, baina Reala lidergoan
Isakek sartu zuen Realaren gola, penaltiz. (Argazkia: Reala) 
Bi urte ingururen ondoren, benetako euskal derbi bat bizi izan zen atzo Anoetan, Realak eta Athleticek zaleen aurrean elkar ikusi baitzuten berriz. Txuri-urdinak zuri-gorriak baino hobeto iristen ziren neurketara, etxeko taldea ligako liderra baita, eta kanpokoa, aldiz, sailkapenaren erdialdean dago. Ordea, derbi gehienak bezala, partida parekatua izan zen, eta ez batak eta ez besteak ez zuten irabazteko meriturik egin, ezta galtzeko meriturik ere.
Hala ere, Reala 68. minutuan aurreratu zen, Isakek sareetara bidali baitzuen Iñigo Martinezek egindako penaltia. Handik gutxira, Martinez kanporatu zuen epaileak bigarren txartel horia erakutsita, eta etxekoek hiru puntuak eskuratzeko dena alde zutela zirudien. Aldiz, luzapenean, Muniainek falta bat jaurti zuen, eta Remirok ez zuen asmatu baloia urruntzean; zutoinean jo zuen eta barrura sartu zen. Horrela ere, Realak lehenengo postuan jarraitzen du, nahiz eta Real Madrilek, Sevillak eta Atletiko Madrilek partida bat gutxiago duten.
Realeko neskek, aldiz, ez zuten partida parekaturik jokatu. Ligako liderraren aurka jokatu zuten, Bartzelonaren aurka alegia, eta txuri-urdinak bigarren sailkatuak izan arren, katalanek erakutsi zuten beste maila batean daudela. Izan ere, 8-1 galdu zuten donostiarrek.
Saskibaloian, Ibaeta Basket emaitza on batekin itzuli zen Lugotik, 70-84 irabazi baitzion Ensino Lugori. Horrela, ligako zortzigarren sailkatuak dira donostiarrak, eta sailkapenean gora egiten jarraitzea bilatuko dute datozen jardunaldietan.
Eskubaloian ere garaipena iritsi da Donostiara, Bera Berak 26-39 irabazi baitzion Granollersi bere etxean. Horrela donostiarrek ligako lehenengo postuan jarraitzen dute, azken urteotan bezala, liga etxera ekartzeko helburu argiarekin.
Izotz hockeyari dagokionez, Txuri Urdineko neskek zein mutilek garaipena eskuratu dute euren partidetan. Hain zuzen, neskek Majadahondaren aurka jokatu zuten Madrilen, eta 0-4 irabazi zuten. Mutilek, aldiz, Milenio Panthersen aurka jokatu zuten etxean, eta 14-3 irabazi zuten. Emaitza horiekin, neskak ligako liderrak dira, eta mutilak hirugarren sailkatuak.
EMAITZAK
Futbola
Emakumezkoen lehenengo maila, 8. jardunaldia
- Bartzelona 8 – Reala 1
Gizonezkoen lehenengo maila, 12. jardunaldia
- Reala 1 – Athletic 1
Saskibaloia
Emakumezkoen lehenengo maila, 7. jardunaldia
- Ensino Lugo 70 – Ibaeta Basket 84
Eskubaloia
Emakumezkoen Ohorezko maila, 7. jardunaldia
- Granollers 26 – Bera Bera 39
Izotz hockeya
Gizonezkoen lehenengo maila, 7. jardunaldia
-
- Txuri Urdin 14 – Milenio Panthers 3
Emakumezkoan lehenengo maila, 6. jardunaldia
- Majadahonda 0 – Txuri Urdin 4
