Taldeko lehena izatea du orain helburu Realak
Realeko jokalariak, Sturm Grazen aurkako gol bat ospatzen. (Argazkia: Reala) Realak Sturm Graz talde austriarra jasoko du gaur Anoetan, Europa ligako taldekako faseko laugarren jardunaldian. Europan oraindik ez du partidarik galdu talde donostiarrak denboraldi honetan, baina taldean bigarren lekuan dago, Monakoren atzetik. Izan ere, taldeko bi talde indartsuen aurka, PSVren eta Monakoren aurka, berdindu egin zuten txuri-urdinek. Hala ere, hirugarren jardunaldian Sturm Grazen aurka irabaztea lortu zuten etxetik kanpo Imanol Alguacilen mutilek, eta gaur ere hiru puntu eskuratu beharko dituzte lehen postuan geratu nahi badute. Europa ligan bereziki garrantzitsua da taldekako fasean lehen postuan geratzea, Txapeldunen ligatik datozen taldeak ekiditeko.
Realak jokalari garrantzitsu batzuk ditu lesionatuta partida honetarako; besteak beste, Mikel Oiartzabal, Nacho Monreal, Asier Illarramendi eta Ander Guevara. Imanol Alguacilek adierazi du partida “ez dela erraza izango”, baina etxean jokatzeak alde egingo du. Partida 18.45ean izango da, Anoetan.
Taldearen egoera
Monako dago taldearen lehen postuan, zazpi punturekin. Partida guztiak irabazi ditu bat izan ezik, Realaren aurkakoa. Txuri-urdinak bigarren postuan dira, bost punturekin. PSV eta Monakoren aurka berdindu egin zuten donostiarrek, eta Sturm Grazen aurka, berriz, irabazi. PSVk Realak baino puntu bat gutxiago ditu, lau, Monakoren aurka galdu, Realaren aurka berdindu eta Sturm Grazen aurka, berriz, irabazi egin baitzuen. Sturm austriarrak azken postuan daude, punturik eskuratu gabe, oraingoz jokatu dituzten hiru partidak galdu egin baitituzte.
Hiru jardunaldi geratzen dira taldekako fasea amaitzeko, eta lehen taldea Europa ligako final zortzirenetara igaroko da; bigarren taldeak, berriz, fase bat gehiago jokatu beharko du, final hamaseirenetara igaroko baita. Hirugarren taldea Konferentzia ligako final hamaseirenetara igaroko da, eta azken taldea Europako txapelketa guztietatik kanpo geratuko da.
