EH Bilduk 2022rako aurrekontuaren proiektuaren genero-eraginari buruzko txostena aurkezteko eskatu du
2022ko aurrekontuen aurkezpena. (Argazkia: Donostiako Udala) 
EH Bilduk ohar baten bidez, 2022rako aurrekontuaren tramitazioa bertan behera uzteko eskatu du, proiektuaren genero-eraginari buruzko txostena aurkeztu arte.2022rako aurrekontu proiektua aurkeztu zuen Eneko Goiak joan den urriaren 25ean eta abenduaren 20rako finkatu zen tramitazio osoaren amaiera. Zuzenketak aurkezteko epea, berriz, azaroaren 24a ezarri zen.
EH Bilduk adierazi duenez, udal-taldeek ez duteproiektuaren genero-eraginari buruzko txostena egin, eta “aurrekontuak egiteko prozesuan funtsezko tresna” dela nabarmendu du. Txostenean jasotzen diren irizpide teknikoen arabera aurkeztutako proiektua zuzentzeko funtsezkoa dela dio.”Txosten hori Gobernuari eskatu genionetik arrazoizko epe bat igaro da, baina zuzenketak egiteko epeak aurrera doaz eta udal talde honek bere lana egin ahal izateko funtsezko elementu hori ez dauka”.
Alderdiaren iritziz, hiri gisa dugun erronka handienetako bat da Berdintasuna lortzea, eta 2022ko berdintasun aurrekontua elaboratzerakoan pandemiak emakumeen egoeran izandako eragina ez da kontuan hartu. Era berean, 2021eko genero-eraginaren txostenak ” aurrekontuetan gabezi larriak zeudela argi utzi” zuela nabarmendu dute. Hala, “hobekuntzarik” egin ez dela eta 2022ko txostena “bide beretik” joango dela azaldu du.
Gainera, Emakumeen eta Gizonen Berdintasunerako otsailaren 18ko 4/2005 Legea ekarri dute gogora. 19. artikuluak ondorengoa dio: “administrazio-arau edo -egintza bat egiten hasi aurretik, hura sustatzen duen administrazio-organoak ebaluatu egin behar du zer eragin izan dezakeen”. 20.artikuluak, ordea, ondorengoa: “Egindako eraginaren ebaluazioaren arabera, arau-proiektuan edo administrazioegintzan neurriak sartu behar dira, kolektibo gisa hartzen diren emakumeen eta gizonen egoeran izan dezaketen eragin negatiboa neutralizatzeko, antzemandako desberdintasunak murrizteko eta sexuen arteko berdintasuna sustatzeko”.
Hala, txosten hori “ahalik eta lasterren” bidaltzeko eskaera egin du gaur eguerdian EH Bilduk. Zehazki, 2022rako aurrekontuaren tramitazioa bertan behera uzteko eskatu du, proiektuaren genero-eraginari buruzko txostena aurkeztu arte.
