Europan aurrera egiteko lehen aukera du Bera Berak
Bera Bera kategoria gorenean dago. (Argazkia: Bera Bera) Larunbat honetan berebiziko garrantzia duen partida jokatuko du Bera Berak Errumanian, Ramnicu Valcea taldearen aurka. Europa ligako sailkapen faseko azken kanporaketan dago Bera Bera, eta joaneko partida izango da biharkoa. Kanporaketa hau irabaziz gero, talde donostiarra Europa ligako taldekako fasera igaroko da.
Dinamika onean da Bera Bera: ligan ez du partidarik galdu eta sailkapenaren lehen postuan dago, eta Europa ligako aurreko kanporaketan Paris 92 taldea kanporatu zuen. Asteazken honetan jokatu du ligako azken partida Galizian, eta 28-33 garaitu zuen Guardes.
Futbolean, Realeko neskek Madrilera egingo dute bidaia, Atletiko Madrilen aurka jokatzeko. Inoiz baino hobe hasi dute txuri-urdinek liga: bi partida bakarrik galdu dituzte, eta sailkapenaren bigarren postuan daude, 21 punturekin. Bartzelona dago lehen postuan, partida guztiak irabazita 27 punturekin. Atletiko hirugarren da, Realak baino hiru puntu gutxiagorekin. Partida garrantzitsua dute beraz Natalia Arroyoren jokalariek. Partida irabaziz gero, bigarren postuan egonkortuko dira txuri-urdinak, Atletiko Madrilekiko sei puntuko aldea izango lukete eta. Realeko mutilek ez dute partidarik jokatuko asteburu honetan, 2022ko Munduko Txapelketarako sailkapen faseko partidak daudenez, ligak geratu egin baitira.
Izotz hockeyan, Txuri Urdineko mutilek Nordic Vikingsen aurka jokatuko dute ligako partida larunbatean. Sailkapenean hirugarren postuan daude donostiarrak, hamabi punturekin, baina gainontzekoek baino partida gutxiago jokatu dituzte, zazpi. Puigcerda dago lehen postuan, 26 punturekin, eta Jaka dago bigarren, hamazazpi punturekin. Neskek asteburu honetan ez dute partidarik jokatuko.
PARTIDAK
Eskubaloia
Europa liga
- Ramnicu Valcea – Bera Bera (larunbata, 14:00)
Futbola
Emakumezkoen lehenengo maila, 10. jardunaldia
- Atletiko Madril – Reala (igandea, 12:00)
Izotz hockeya
Gizonezkoen lehenengo maila, 9. jardunaldia
- Nordic Vikings – Txuri Urdin (larunbata, 15:15)
