Star Wars solidarioaren munduko hiriburu bihurtuko da Donostia
Star Wars sagaren unibertsoa hirira iritsiko da hilabete bukaeran. Pink Force Day jardunaldi solidarioa egingo dute Donostian, hilaren 26an eta 27an. Lehen aldia da topaketa solidario hau egiten dena, mundu osoan, eta Gipuzkoako Odol Emaileen Elkartea ikusaraztea eta omentzea du helburu.
Egitarauaren osagai nagusietako batzuk gaur aurkeztu dituzte, Donostiako Udaletxean: Miramar Jauregian herritarrei irekitako photocall-a, Stars Wars sagako jantzien erreplika zehatzak eramango dituzten berrehun lagunen baino gehiagoren desfilea, eta Orkestra Filarmonikoaren eta Abesbatzaren kontzertua.
Ekitaldi nagusian Albin Johnson 501 Legioaren sortzaileak parte hartuko du. Star Wars sagaren zaleen nazioarteko elkartea da eta 14.000 kide baino gehiago ditu. Horrez gain, Samantha Alleyne aktore britainiarrak ere bisitatuko du Donostia, ekitaldian parte hartzeko. Star Warsen Stormtrooper bat izandako lehenengo emakumea da, eta Disney garaiko sagaren bost filmetan agertu da.
The Pink Force Fundazioak antolatutako ekitaldi honek Eusko Jaurlaritzako Turismo eta Merkataritza Sailaren, Gipuzkoako Foru Aldundiaren, Donostiako Udalaren eta Gipuzkoako Odol Emaileen Elkartearen lankidetza eta babesa ditu.
Egitaraua
Azaroak 26, ostirala
- 16:00-18:00. Photocall-a eta doako erakusketa Miramar jauregian, jendearentzat irekia.
- 18:30. Photocall-a Stormtrooper-ekin Maria Cristina hotelean.
- 19:00. Albin Johnsonekin Viktoria Eugenia Antzokiraino.
- 19:30. Orkestra Filarmonikoaren eta Abesbatzaren kontzertu solidarioa Gipuzkoako Odol Emaileen Elkartearen alde, Viktoria Eugenia Antzokian. Kontzerturako sarrerak antzokiko leihatiletan nahiz Donostia Kulturaren webean eskuratu daitezke.
Azaroak 27, larunbata
- 10:30-14:00. Photocall-a eta doako erakusketa Miramar jauregian, jendearentzat irekia.
- 17:00-18:00. Elkartasunezko desfilea Miramar jauregitik Donostiako Udaletxera, Kontxa pasealekutik.
- 18:00-20:00. Gipuzkoako Odol Emaileen Elkarteari omenaldia eta photocall-a, udaletxeko terrazan.
