Europa ligako taldekako fasera sailkatzeko azken aukera
Bera Bera eta Zuazo taldeen arteko euskal derbia, Gasca kiroldegian. (Argazkia: Bera Bera) Bera Berak Ramnicu Valcea Errumaniako taldearen aurka jokatuko du asteburu honetan Donostian; Europa ligako sailkapen faseko azken kanporaketako bigarren partida izango da, itzulerakoa. Errumanian 34-28 galdu zuen talde donostiarrak, eta gutxienez sei goleko aldez irabazi beharko dute taldekako fasera igaro nahi badute. Paris 92ren aurka egin zuten balentria, eta berriro egin dezaketela uste dute. Ligan ez du areriorik Bera Berak: bederatzi partida irabazi eta bat berdindu du bakarrik, eta oraindik ez du partidarik galdu. Sailkapeneko lehen postuan dira donostiarrak, eta bigarrena hiru puntu atzerago dago, Rocasa.
Futbolean, Realeko neskek Teneriferen aurka jokatuko dute igandean Zubietan. Inoiz baino hobeto daude txuri-urdinak, sailkapenean bigarren postuan baitaude. Bartzelona dago lehen postuan, partida guztiak irabazita. Talde katalanak lau txapelketetatik hiru irabazi zituen: liga, Txapeldunen liga eta Erreginaren kopa. 21 puntu ditu Realak, eta hirugarren Athletik dago, 19 punturekin. Asteburu honetako aurkaria, Tenerife, sailkapeneko zazpigarren postuan dago, 16 punturekin.
Realeko mutilek ere etxean jokatuko dute igande honetan, Valentziaren aurka. Reala lider da 28 punturekin, eta atzetik Real Madril eta Sevilla ditu, 27 puntu banarekin, nahiz eta bi talde hauek partida bat gutxiago jokatu duten. Valentzia hamargarren postuan dago, 17 punturekin, baina valentziarrak Donostiara etortzen direnean emaitza onak lortu ohi dituzte. Anoetara etorri diren azken bost partidetatik hiru irabazi dituzte valentziarrek, eta bi galdu.
Izotz hockeyan, Txuri Urdineko mutilek larunbatean Jakaren aurka jokatuko dute Donostian. Zortzi taldeko ligan laugarren daude donostiarrak, eta aurkaria, Jaka, bigarren. Huescako taldeak 17 puntu ditu, eta Txuri Urdinek 12. Hala ere, bi talde hauek gainontzekoek baino partida gutxiago jokatu dituzte; izan ere, lehen eta hirugarren sailkatuek, Puigcerdak eta Majadahondak hurrenez hurren, hamar partida jokatu dituzte, eta Jakak eta Txuri Urdinek, berriz, zortzi.
Txuri Urdineko neskek, berriz, larunbat gauean jokatuko dute partida etxetik kanpo, Huarteko Kosnerren aurka. Partida guztiak irabazita, lider dira donostiarrak, eta Kosner azken aurrena dago sailkapenean, partida guztiak galduta. Ligaren erdia egin dute jada donostiarrek, eta beste zazpi partida geratzen zaizkie. Ezin hobeto egin dute lehen erdia, eta bigarren itzulian gauzak antzera egin ezkero, liga irabaziko dute donostiarrek. Txuri Urdineko neskek ez dute oraindik titulurik lortu, eta talde donostiarrarentzat lehen liga izango litzateke. 2019. urtean bigarren geratu ziren.
Saskibaloian, Ibaeta Basketek Uni Gironaren aurka jokatuko du Katalunian, igandean. Girona hirugarren dago sailkapenean, hamalau punturekin, eta donostiarrak bederatzigarren dira, hamaika punturekin. Lehen zortzi talderen artean jokatuko dute ligako txapelketa liga erregularra amaitzean, eta une honetan donostiarrak kanpoan daude.
PARTIDAK
Eskubaloia
Europa liga
- Bera Bera – Ramnicu Valcea (larunbata, 16:00)
Futbola
Gizonezkoen lehenengo maila, 14. jardunaldia
- Reala – Valentzia (igandea, 21:00)
Emakumezkoen lehenengo maila, 6. jardunaldia
- Reala – Tenerife (igandea, 12:00).
Izotz hockeya
Gizonezkoen lehenengo maila, 10. jardunaldia
- Txuri Urdin – Jaka (larunbata, 14:50).
Emakumezkoen lehenengo maila, 8. jardunaldia
- Kosner Huarte – Txuri Urdin (larunbata, 21:15)
Saskibaloia
Emakumezkoen lehenengo maila, 9. jardunaldia
- Uni Girona – Ibaeta Basket (igandea, 18:00)
