Aurrera doaz Paco Yoldi kiroldegiko gimnasio berriaren lanak
(Argazkia: Donostiako Udala) 
Amara Berriko Paco Yoldi kiroldegiko gimnasio berria eraikitzeko lanak erritmo onean doaz, eta dagoeneko ikus daiteke kirol espazio berri horrek hartuko duen eremua. Taberna eta jarduera aretoak zeuden gunean kokatu dute, igerilekura eta kanpoaldera begira. Urte bukaerarako erabilgarri izatea espero dute.
Aste honetan adjudikatu du udalak gimnasioko makinentzako alokairu kontratua. Formula hori lehen aldiz erabiliko du hiriko udal gimnasio batean, eta aukera emango du makinak erabat berritzeko, matxuratutako makinak denbora gutxiagoan konpontzeko eta ordezkatzeko –konponketa denbora aurreikusitakoa baino luzeagoa denean–. Gainera, kontratuaren bost urteko epea bukatzean, makina guztiak berrituko dira lehiaketa berri baten bidez.
Lau gune handi
Paco Yoldiko gimnasio berriak lau gune handi izango ditu: gune kardiobaskularra, muskulazio makinen gunea, pisu libreko gunea eta entrenamendu funtzionaleko gunea. Makinek bluetooth teknologia izango dute kanpoko gailuekin konektatzeko eta erabiltzaileek entrenamenduak erregistratzeko eta lan kontrolatuagoa egiteko, gimnasioko monitoreak aholkatuta.
Eremu kardiobaskularrak hainbat motatako 55 makina izango ditu –korrika egiteko zintak, bizikletak, ergometroak, eliptikoak eta abar–, merkatuko makinarik modernoenetako batzuk barne. Makina gidatuekin indarra lantzeko edo muskulaturako eremuan, beste hamazazpi makina instalatuko dira, muskulu talde guztiak lantzeko: bizepsak, koadrizepsak, deltoideak, abdominalak eta abar. Pisu libreko guneak hainbat motatako bankuak, eserlekuak jartzeko makinak, power rack altxatze plataformak eta abar izango ditu. Pisu libre ugari ere egongo da, tartean, bi kilotik 42 kilorainoko olinpiar barrak eta eskulanak.
Azkenik, eremu funtzionalean, poleak, uztaiak edo TRX jartzeko egitura bat instalatuko da, bai eta luzatze eremu bat ere. Era berean, eremu horri material desberdina emango zaio lan funtzional horretarako.
Obra horien ondorioz, beste jarduketa batzuk ere egingo dituzte: igerilekuetako harmailen eremurako sarbide berri bat, komun berriak eta egonleku bat, mahai eta salmenta makina osasungarriekin, igerileku txikiko begiratokiaren ondoan.
