Realak ezin izan du Monakorekin
Aihen Muñoz, Monakoren aurkako jokaldi batean. (Argazkia: Reala) 
Realak Europa ligako taldekako faseko azken neurketa jokatu zuen ostegunean Monakon, eta ezin izan zuen Niko Kovacen taldea garaitu. Txuri-urdinei kostatzen ari zaie ligan erakusten ari diren maila Europan ere erakustea, eta atzokoa ez zen salbuespena izan, ez baitzuten partida batere ona egin. Hala ere, lehenengo minututik azkeneraino saiatu ziren Imanol Alguacilen mutilak, baina gauzak ez ziren ateratzen; besteak beste, Silvak eta Merinok ez zutelako euren eguna izan. Halako bi jokalarik egun txarra badute, zaila da taldeak ondo funtzionatzea.
Hasieratik, Reala bere jokoa egiten saiatu zen, baina baita Monako ere, eta etxekoak izan ziren nagusi zelaian. Anoetako partidan egin zuten moduan, euren nagusitasun fisikoa agerian gelditu zen, eta, Anoetan ez bezala, aurrelariek arriskua sortu zuten ate txuri-urdinean. Horrela, 28. minutuan iritsi zen neurketako lehenengo gola, Vollanden eskutik. Zubimendik baloia galdu zuen zelai erditik gertu, Monakok kontraerasoa abiatu zuen, eta Golovinek azken pasea eman zion Vollandi, honek, ia ate barruan, gola egin zezan.
Reala neurketatik kanpo zegoela zirudien, baina handik gutxira, 34. minutuan, Isakek desmarke bikain bat egin zuen, Januzajek are pase bikainago bat eman zion, eta aurrelari suediarrak kalitate handiz gainditu zuen atezaina, markagailuan berdinketa jartzeko. Txuri-urdinek partidari buelta eman ahal ziotela zirudien, baina ilusioak gutxi iraun zuen, Fofanak 2-1-ekoa egin baitzuen 36. minutuan.
Hortik aurrera, Reala berdinketaren gola egiten saiatu zen, baina arrisku handirik sortu gabe, Isaken gol aukera bat kenduta. Barrenetxea, Turrientes, Portu eta Sorloth (Isaken lesioaren ondoren) ere zelairatu ziren, baina ez ziren gai izan arrisku handirik sortzeko. Monakok, aldiz, emaitza mantentzeko helburu argiarekin, bere jokoa egiten jarraitu zuen, eta zelaian nagusi izan zen une oro.
Horrela, taldeko hirugarren sailkatua da Reala, eta final bat jokatu beharko du PSVren aurka abenduaren 9an. Izan ere, irabazteak baino ez dio balio, hurrengo fasera pasatzeko. Neurketa Anoetan izango da, 18:45ean.
