Sailkapenaren lehen postura itzultzeko aukera bikaina du Realak
Alexander Isak, Espanyolen aurkako gol bat ospatzen. (Argazkia: Reala) Igande honetan partida garrantzitsua dute Imanol Alguacilen jokalariek; Espanyolen aurka jokatuko dute Cornellan, eta lehen postua berreskuratzeko aukera ona dute. Izan ere, orain Real Madril dago lehen postuan, txuri-urdinek baino puntu bat gehiagorekin, baina Sevillaren aurka jokatuko du Ancelottiren taldeak, sailkapeneko hirugarrenaren aurka. Hiru puntuak lortzeko gogor borrokatu beharko dute madrildarrek. Realak ere ez du partida erraza izango, etxean bikain moldatzen ari baitira: partida bakarra galdu dute etxean, Atletico Madrilen aurka, eta bi partida berdindu eta lau irabazi dituzte. Realeko neskek ez dute partidarik jokatuko asteburu honetan, nazioarteko partidak jokatzeko geldialdia baitago. Realeko hockey jokalariek ere ez dute partidarik, liga martxoan itzuliko baita.
Izotz hockeyan, Txuri Urdineko neskek aukera bikaina dute bigarren sailkatuari puntu gehiago ateratzeko eta txapelketa bideratzeko. Jakaren aurka jokatuko du larunbatean Donostian, eta jarraian bederatzigarren garaipena lortu dezakete donostiarrek; oraindik ez dute punturik galdu ligan. Majadahonda doa bigarren, eta madrildarrak ere liga bikaina egiten ari dira: partida bakarra galdu dute, Txuri Urdinen aurka, hain zuzen ere. Majadahondak Txuri Urdinek baino bi partida gutxiago jokatu ditu.
Txuri Urdineko mutilek Milenio Logroñoren aurka jokatuko dute Errioxan; laugarren postuan daude donostiarrak, lau partida irabazi eta bost galduta, eta sailkapeneko azkenaren aurka jokatuko dute: Milenio Logroñok jokatu dituen partida guztiak galdu ditu.
Saskibaloian, Ibaeta Basketek Bembibreren aurka jokatuko du larunbatean Donostian; playoffetik bi puntura dago Ibaeta Basket, baina sei talde daude puntu berdinekin, Bembibre tarteko. Jaitsiera postua puntu batera dute donostiarrek. Playoffaren eta jaitsiera postuen artean dauden taldeen artean, beraz, lehia sutsua dago, eta garaipena eskuratzea aurrerapauso garrantzitsua izango da.
Snowboardean, Lucas Egibarrek Munduko Kopako lehen txapelketa izango du, Txinan. Gaur hasiko dira lehen probekin, eta igandean izango dira kanporaketak eta finalak.
PARTIDAK
Futbola
Gizonezkoen lehen maila, 15. jardunaldia
- Espanyol – Reala (Igandea, 16:15)
Izotz Hockeya
Emakumezkoen lehen maila, 9. jardunaldia
- Txuri Urdin – Jaka (Larunbata, 21:00)
Gizonezkoen lehen maila, 10. jardunaldia
- Milenio Logroño – Txuri Urdin (Larunbata, 14:25)
Saskibaloia
Emakumezkoen lehen maila, 10. jardunaldia
- Ibaeta Basket – Bembibre (Larunbata, 18:00)
