Donostiako erdialdeko auzoak husten eta zahartzen ari dira
Donostiako etxebizitza turistiko bat iragartzen duen kartela. Haritik Hirira geografo taldeak, turismoaren gorakadak hirian izaten ari den hainbat ondorioen inguruko datuak zabaldu ditu sare sozialetan. Turisten presentzia areagotzen denean, ostatu eskaria handitzen da. Hala, etxebizitzen jabe askok turismo-sektorera egokitzen dituzte eta honek, biztanleriaren desplazamendua eta auzoen hustuketa dakar.
Geografo taldeak azaltzen duen moduan, etxebizitza turistiko asko erdialdeko auzoetan kokatzen dira. Etxebizitza eskaintzaren jaitsierak prezioen igoera dakar, eta ondorioz, gazteek ez dute erdialdeko auzoetan etxebizitza bat erosteko edo alokatzeko aukerarik. Periferietako auzoetara edo inguruko udalerrietara jotzen dute prezio baxuagoen bila.
Joera horrek, erdialdeko auzoen zaharkitzea dakar. Haritik Hirirako kideen datuen arabera, horiek dira auzo zaharkituenak eta batez besteko adin altuena dutenak. Zehazki, Grosen 49,33 urtekoa da, Erdialdean 48,95ekoa eta Parte Zaharrean 46,11koa.
Biztanleria bilakaera
2000-200 epealdian Donostiak, oro har biztanleria irabazi duen bitartean, hainbat auzotan joera desberdinak izan dira. Erdialdeko auzoetan beherakada nabaritu da. Miramonen, Loiolan eta Ibaetan esaterako, gorakada nabarmena izan da.
Argazkia: Haritik Hirira.
Desplazamendu hauek, auzoko saltokietan eragiten dute. “Pixkanaka, bisitarien beharrak (ostatua, elikadura, zerbitzuak eta abar) asetzen dituzten establezimenduak sortzen dira” eta “tokiko saltokiak eta saltoki tradizionalak desagertzen hasten dira”. “Biztanleriaren desplazamenduak auzoan errotuago dauden denden gainbehera faboratzen du, ohiko bezeroen galerarekin lotuta. Bestetik, saltoki tradizionalen inguruan egunero eraikitzen diren harremanen sistema desegiten da”, azaldu du taldeak.
