Kresala danborradak ere ez ateratzea erabaki du
Kresala Elkartearen danborradan irten ziren lehen aldiz emakumeak 1980. urtean. (Argazkia: Estitxu Zabala) 
Ikusmira handia dago Donostiako Udalak San Sebastian egunerako hartuko duen erabakiaren harira. Konpainia batzuk ordea, aurrera urratsa eman dute, eta ez direla aterako iragarri dute. Azkena, Kresala elkartea izan da, eta “erantzukizunagatik eta osasun sistemarekiko elkartasunagatik” hartu dute erabakia, “pena handiz” bada ere. Lehenago, beste bost konpainiek hartu dute erabakia: Aldapeta Ikastetxea, Catedral Centenario, Eiztari Etxea, Euskal Billera eta Peña Anastasio, hain zuzen.
Bertako bazkide batek jakinarazi duenez, Club Ciclista Donostiarra ere ez da aterako, eta dirudienez gehiago dira erabakia hartzen ari diren konpainiak.
Udala hilaren 10ean zen erabakia hartzekoa, baina helduen eta haur danborraden konpainietako ordezkariek eskatuta, ostiralean, hilaren 7an, bilduko da konpainiekin, gaiari buruz hitz egiteko. Arratsaldean bilduko dira, eta udalak aurreikusten du danborrada antolatzeko, ez antolatzeko edo beste modu batera antolatzeko erabakia egunean bertan iragartzea.
Gaur egungo egoeran, zaila dirudi danborrada bere horretan antolatu ahal izatea, koronabirusaren kutsatzeak etengabe gora egiten ari direnez, ekitaldi kultural gehienak bertan behera gelditzen ari direlako leku askotan.
