2020ko omenaldia, Txillardegi plazan. (Argazkia: Nerea Lizarralde) Urtarrilaren 14an, Jose Luis Alvarez Enparantza, Txillardegi, hil zeneko 10. urteurrena izango da. Urtarrilaren 11n, 13an, 15ean eta 18an hainbat ekimen antolatu dituzte San Telmo Museoan eta Antigua auzoan “Txillardegiri zor zaion aitortza publikoa aldarrikatuz eta izenik ez duen Donostiako Udal Liburutegi zentralari bere izena jar diezaioten eskatuz”.
Urtarrilaren 11n, “Txillardegiren hizkuntza politikaren oinarriak eta gaurkotasuna” mahai-ingurua egingo da San Telmo Museoan 19:00etan. Araitz Aizpuru eta Iñigo Urrutiak zuzenduko dute, eta Telesforo Monzon Fundazioko Txillardegi Gogoeta Guneak antolatu du. Urtarrilaren 13an, Kronika liburua aurkeztuko dute Koldo Izagirre, Garbiñe Ubeda, Juan Luis Zabala eta Gorka Bereziartuak 19:00etan. Susa argitaletxea eta Argia aldizkariak antolatu dute.
Urtarrilaren 15ean, berriz, “Txillardegi gogoan” omenaldia egingo dute 12:00etan Antiguako Txillardegi plazan (Gaskonia). Horma irudi berritua inauguratuko dute eta ondoren, euskal idazle baten esku hartzeaz gain, txilar landareak landatuko dira. Bertan izango dira txalapartariak, Beñat eta Unai Gaztelumendi bertsolariak, Janitz Enparantza txistularia eta Sua Enparantza eta Natale Bueno dantzariak. Ekitaldia Euskal Herrian Euskaraz kanta abestuz eta muxiko bat dantzatuz amaituko dute.
Azkenik, urtarrilaren 18an, 19:00etan, San Telmo Museoan, Jakin fundazioak prestaturiko Txillardegiri buruzko bi liburu berriren aurkezpena egingo da: Txillardegi: Euskalgintza eta Txillardegi: intelektuala eta gizartea. Alaitz Aizpuru, Lorea Agirre eta Igone Lamarainek dinamizatuko dute.
Horrezaz gain, 2022ko udaberrian, Telesforo Monzon Fundazioaren egoitza den Bergarako Olaso Dorrean, Txillardegiri buruzko erakusketa zabalduko da, eta Euskal Herrian Euskaraz (EHE) taldeak mintegi bereziaren antolaketa iragarri du. Azkenik, aurtengoan KORRIKA Donostian bukatzen denez, Txillardegi Udal Liburutegia Herri Ekimena taldeak ekimen berezia burutuko du Txillardegi Udal Liburutegiaren aldeko aldarrikapenak presentzia berezia izan dezan.
Ekitaldi guztietan osasun neurriak hartuko dituzte.
