Antiguako Jai Batzordeak sansebastianetako egitaraua bertan behera utzi du
Antiguako sansebastianetako poteo elegantea. (Argazkia: Iñaki Agirre) 
Antiguako Sansebastianak ez ospatzea erabaki du jai batzordeak. Ohar baten bidez azaldu dituzte arrazoiak: “Pandemiaren ezarri zaizkigun neurri eta baldintzak aztertuta, auzoan sustatu nahi dugun jai ereduarekin bat egiten duen egitarau bat aurrera eramatea ezinezkoa dela ondorioztatu dugu. Horregatik, pena handiarekin eta urtean zehar egin dugun lan guztia albo batera utzita, 2022 honetan ez dugu jairik antolatuko”.
Halaber, eskerrak eman dizkiete aurten ere laguntza eskaini dieten saltoki, taberna eta auzokide guztiei. “Jakinarazten dizuegu datozen asteetan zehar banan-banan pasako garela jaien antolakuntzarako jasotako ekarpen horiek guztiak bueltatzeko. Bestalde, jaietako liburuxkarako idatziak bidali dizkiguzuenei ere, gure eskerrik beroenak. Ongi gordeko ditugu aukera izaterakoan argitaratu eta zabaltzeko”, azaldu dute.
Datorren urtean Antiguako Sansebastianak “inoiz baino gogo eta indar gehiagorekin” ospatu ahal izateko lanean jarraituko dutela adierazi dute.
